بابری مسجد معاملہ: عزم کریں کہ صبر کا دامن تھامے رکھیں گے، نسیم خان

ممبئی: مہاراشٹر کے سابق وزیر و ریاست کے قدآور مسلم لیڈر محمد عارف نسیم خان نے منگل کے روز مسلمانوں سے اپیل کی ہے کہ بابری مسجد حق ملکیت مقدمہ پر سپریم کورٹ کے متوقع فیصلے پر صبروتحمل کا مظاہرہ کیا جائے اور امن و امان کی فضا برقرار رکھی جائے۔ انہوں نے حکومت سے بھی امن و امان برقرار رکھنے کے لئے موثر اقدامات کرنے کا مطالبہ کیا اور شرپسند عناصر کے خلاف سخت کارروائی کی مانگ کی۔

ممبئی کے مضافات سے نکالے جانے والے جلوس عید میلاد النبی کے تعلق سے گھاٹکوپر پولس اسٹیشن میں منعقدہ ایک میٹنگ سے خطاب کرتے ہوئے جہاں انہوں نے جلوس کی تیاریوں کے تعلق سے مفید مشورے دیئے اور میٹنگ میں موجود اعلی افسران سے بات چیت کی وہیں میٹنگ میں موجود سیکڑوں ملی و سماجی تنظیموں کے سربراہان سے انہوں نے اپیل کی کہ سپریم کورٹ کے فیصلے کو تسلیم کرتے ہوئے ہم صبروتحمل کا مظاہرہ کریں ۔

اس موقع پر نسیم خان نے مسلمانوں سے اپیل کی کہ جشن عید میلادالنبی کے موقع پر مسلمان عزم کریں کہ پورے ممبئی شہر سے نشہ خوری کے خلاف جہاد چھیڑیں گے اور جو نوجوان اس کی لت میں مبتلا ہیں ان کو بچانے کی پوری کوشش کی جائے ۔

انہوں نے کہا کہ نوجوانوں کو نشہ کی لت میں مبتلا کرنے کی ایک منظم سازش اس شہر میں رچی جا رہی ہے ضرورت اس بات کی ہے کہ مستقبل میں نوجوانوں کو اس لت سے بچانے کے لے متحدہ طور پر تحریک چلائی جائے تا کہ نسل نو کو منشیات سے پاک کر کے ان کی دنیاوی زندگی بہتر بنائی جائے ۔