کیجریوال پر ’مرچ پاؤڈر‘ سے وار، عآپ نے کہا بی جے پی ذمہ دار

دہلی کے وزیر اعلی اروند کیجریوال کے اوپر ایک شخص نے مرچ پاؤڈر سے حملہ کیا ہے۔ حملہ آور کا نام انل ورما ہے، اسے پولس آئی پی اسٹیٹ پولس اسٹیشن لے کر گئی ہے۔ میڈیا رپورٹوں کے مطابق دہلی سکریٹریٹ کے باہر اروند کیجریوال پر مرچ پاؤڈر ڈالا گیا اور کچھ پاؤڈر ان کی آنکھ میں بھی چلا گیا۔

حملہ ور انل شرما دہلی کے نارائنا کا رہنا والا ہے۔ بتایا جا رہا ہے کہ دوپہر تقریباً 2 بج کر 10 منٹ پر کیجریوال پر اس وقت حملہ کیا گیا جب وہ لنچ کے لئے چیمبر سے باہر نکل رہے تھے۔

عام آدمی پارٹی نے اس حملہ کے فوری بعد پریس کانفرنس کی اور حملہ کے لئے بی جے پی کو ذمہ دار ٹھہرایا۔ عآپ کے رہنما سوربھ بھاردواج نے کہا کہ لوگوں کو یہ پیغام دیا جا رہا ہے کہ عآپ رہنماؤں پر جتنے چاہے حملے کرو آپ کا کچھ نہیں بگڑے گا۔ انہوں نے کہا کہ مرکزی حکومت اب حملہ آور کو بچانے میں لگ جائے گی اور اسے کوئی سزا نہیں ملے گی۔ سوربھ بھاردواج نے ناتھورام گوڈسے کا حوالہ دے کر کہا کہ ملک کا ماحول آج پھر ویسا ہی بنایا جا رہا جیسا گاندھی جی کے قتل کے وقت بنا دیا گیا تھا۔

سوربھ بھاردواج نے کہا، ’’ہمیں پورا یقین ہے کہ حملہ کے تار بی جے پی سے جڑے ہیں۔ پورا کھیل بی جے پی نے اسپانسر کیا ہے۔ مودی انتظامیہ حملہ کرنے والوں کی مدد کر رہی ہے۔‘‘ انہوں نے کہا، ’’وزیر اعلیٰ کے قتل کی سازش کی جا رہی ہے۔ جو آج ہمارے ساتھ ہو رہا ہے کل کسی دوسری سیاسی جماعت کے ساتھ کیا جائے گا۔‘‘ ادھر راگھو چڈھا نے کہا کہ مودی حکومت مجرموں کو تحفظ دے رہی ہے۔

عام آدمی پارٹی کی رکن اسمبلی الکا لامبا نے اسے سوچی سمجھی سازش قرار دیا اور کہا کہ سکریٹریٹ جیسے محفوظ مقام پر وزیر اعلی پر حملہ کیا گیا یہ کافی سنگین معاملہ ہے۔

عام آدمی پارٹی کے رہنما سنجے سنگھ نے کہا، ’’دہلی سکریٹریٹ کی سیکورٹی مودی حکومت کے ماتحت ہے، تو کوئی شخص مرچ پاؤڈر اور ماچس لے کر اروند کیجریوال تک کیسے پہنچ گیا؟ یہ حملہ قاتلانہ ہو سکتا تھا، بی جے پی نے سی بی آئی، پولس، افسران اور غنڈے سب اروند کیجریوال کے پیچھے چھوڑ رکھے ہیں۔‘‘

ادھر بی جے پی نے وزیر اعلیٰ اروند کیجروال پر حملہ کی مذمت کی ہے۔ پارٹی کے رہنما وجندر گپتا نے کہا کہ جمہوریت میں تشدد کی کوئی جگہ نہیں ہے، جس نے بھی ایسا کیا اسے سزا ملنی چاہیے۔