اے ٹی ایم کارڈ کلوننگ گروہ کا پردہ فاش، تین افراد گرفتار

نئی دہلی: دہلی پولس کی کرائم برانچ کی ٹیم نے اے ٹی ایم کارڈ کی کلوننگ کرنے والے گروہ کا پردہ فاش کرکے اس میں ملوث تین افراد کو گرفتار کرلیا ہے۔ ان کے پاس سے 67 اے ٹی ایم کارڈ برآمد ہوئے ہیں۔

کرائم برانچ کے ڈپٹی کمشنر آف پولس ڈاکٹر جی رام گوپال نائک نے ہفتے کے روز یہاں بتایا کہ اے ٹی ایم کارڈ کلوننگ کرنے والا یہ گروہ گزشتہ دو سال سے زیادہ وقت سے سرگرم تھا۔ اس دوران ان لوگوں نے ایک سو سے زیادہ افراد کے ساتھ دھوکہ دہی کی ہے۔ ان لوگوں کے خلاف ممبئی پولس میں بھی اے ٹی ایم کارڈ کلوننگ کا معاملہ بھی درج کیا ہے۔

رام گوپال نائک نے بتایا کہ ان کی شناخت ہنس نیتن کوٹھاڈیا (38)، انوبھو عرف بابو(23) اور دلشاد (33) کے طور پر ہوئی ہے۔ ان کے پاس سے 67 کلون کیے گئے اے ٹی ایم کارڈ، ایک اسکیمنگ مشین، دو خفیہ کیمرہ، ایک ایم ایس آر رائٹ اور ایک لیپ ٹاپ برآمد کیا گیا ہے۔

انہوں نے کہا کہ ڈیبٹ اور کریڈٹ کارڈ کے ساتھ دھوکہ دہی کے بڑھتے جرائم کی شکایتوں کے پیش نظر کرائم برانچ نے اے سی پی پنکج سنگھ کی نگرانی میں ایک ٹیم تشکیل دی، جس نے یکم نومبر کو تینوں ملزموں کو سرائے کالے خاں بس ٹرمینل کے پاس سے گرفتار کر لیا گیا ہے۔

پولس پوچھ گچھ میں پتہ چلا کہ گروہ کے افراد پورے ملک میں اے ٹی ایم کارڈ کی کلوننگ کرنے کا کام کرتے تھے۔ ان لوگوں نے قبول کیا ہے کہ اسکیمنگ مشین اور خفیہ کیمرہ انھیں ایک نائیجیریائی شہری سے ملا ہے۔ اسکیمنگ مشین کو اے ٹی ایم میں لگا دیتے تھے جس سے کارڈ کا مکمل ڈاٹا ریکارڈ کر لیا جاتا تھا اور خفیہ کیمرے سے اے ٹی ایم کارڈ کے پن کو ریکارڈ کر کے بہ آسانی اے ٹی ایم کارڈ کی کلوننگ کرلی جاتی تھی۔ پولس اس معاملے میں تفصیلی تحقیقات کر رہی ہے تاکہ اس میں ملوث تمام افراد کو گرفتار کیا جا سکے۔