مودی حکومت کو ’اے ڈی بی‘ نے دیا لگاتار تیسرا جھٹکا، ایک بار پھر جی ڈی پی پر سوالیہ نشان!

ایشیائی ڈیولپمنٹ بینک یعنی اے ڈی بی نے رواں مالی سال کے لیے ہندوستانی جی ڈی پی کی شرح ترقی کے اندازہ کو ایک بار پھر گھٹا دیا ہے۔ اے ڈی بی کے مطابق ہندوستان کی جی ڈی پی 20-2019 میں 7 فیصد رہ سکتی ہے۔ اس سے قبل اسی سال اپریل میں بھی اے ڈی بی نے اقتصادی شرح ترقی کے اعداد و شمار جاری کیے تھے۔ ان اعداد و شمار میں جی ڈی پی گروتھ کا اندازہ گھٹا کر 7.2 فیصد کیا گیا تھا جو اس سے قبل 7.6 فیصد تھا۔ آسان زبان میں کہا جائے تو یہ لگاتار تیسری بار ہے جب اے ڈی بی نے جی ڈی پی گروتھ کے اندازے کو گھٹایا ہے۔

خبروں کے مطابق اے ڈی بی نے اپنے ایشیائی ڈیولپمنٹ منظرنامہ-2019 میں کہا ہے کہ ’’مالی سال 19-2018 کے سرکاری خزانہ میں خسارہ سے متعلق فکر کو دیکھتے ہوئے ہندوستان کی اقتصادی شرح ترقی 20-2019 میں 7 فیصد اور 21-2020 میں 7.2 فیصد رہنے کا اندازہ ہے۔ یہ اے ڈی بی کے ذریعہ اپریل میں ظاہر کیے گئے اندازے سے کم ہے۔‘‘ حالانکہ اے ڈی بی نے جنوبی ایشیائی حلقہ کے ڈیولپمنٹ میں تیزی کے اندازے کو برقرار رکھا ہے۔ سال 2019 میں اس علاقے کی اقتصادی شرح ترقی 6.6 فیصد اور 2020 میں 6.7 فیصد رہنے کا اندازہ ہے۔

واضح رہے کہ اے ڈی بی کے یہ اعداد و شمار ایسے وقت میں آئے ہیں جب حکومت ہند 2025 تک 5 ٹریلین ڈالر کی اکونومی کے نشانے پر کام کر رہی ہے۔ حکومت کا کہنا ہے کہ اس ہدف کو حاصل کرنے کے لیے ملک کی جی ڈی پی میں 8 فیصد کے گروتھ کی ضرورت ہے۔ حال ہی میں اقتصادی سروے پیش کرتے ہوئے وزیر مالیات نرملا سیتارمن نے بتایا تھا کہ ہندوستان کو سال 2025 تک 5 ٹریلین ڈالر کی اکونومی بنانے کے لیے 8 فیصد کی رفتار سے جی ڈی پی گروتھ ضروری ہے۔