راہل گاندھی کا ’کم از کم آمدنی‘ والا اعلان تاریخی، جلد راجستھان میں لاگو ہوگا منصوبہ: گہلوت

راجستھان کے وزیر اعلیٰ اشوک گہلوت نے ’کم از کم آمدنی گارنٹی‘ کے اعلان کو تاریخی قرار دیا ہے، انہوں نے کہا کہ ریاستی حکومت اس سمت میں کام کر رہی ہے اور جلد ہی اسے راجستھان میں لاگو کر دیا جائے گا۔

اشوک گہلوت نے ٹوئٹ کر کے کہا، ’’راہل جی کا کم از کم آمدنی کی گارنٹی کے اعلان کو، میں تاریخی مانتا ہوں۔ گارنٹی دینا کسی کو کہ کوئی بھوکا نہ سوئے، دنیا میں ایسے اعلان کی امید کسی نے نہیں کی ہوگی۔ ہر شخص کی کم از کم آمدنی کسی نہ کسی شکل میں یقینی بنائی جائے یہ بہت بڑی بات ہے۔ راہل گاندھی نے ایسا کر کے تاریخ رقم کی ہے۔‘‘

انہوں نے مزید کہا، ’’بہت جلد راجستھان ملک کی پہلی ریاست ہوگی جہاں عوام سوشل سیکورٹی نیٹورک کا حصہ ہوگی اور سبھی کے کھاتے میں آمدنی آئے گی۔‘‘

واضح رہے کہ پیر کے روز چھتیس گڑھ میں ’کسان آبھار ریلی‘ کے دوران راہل گاندھی نے تاریخی اعلان کیا تھا۔ انہوں نے کہا تھا کہ مرکز میں کانگریس کی حکومت آنے پر غریبی دور کرنے کی ہر ممکن کوشش کی جائے گی اور اس کے لئے ملک کے ہر غریب کو کم از کم آمدنی کی گارنٹی دی جائے گی۔ یعنی ہر غریب شخص کے کھاتے میں کم از کم آمدنی منتقل کی جائے گی۔ راہل گاندھی نے یہ اعلان کرتے ہوئے دعوی کیا تھا کہ دنیا کی کسی بھی حکومت نے آج تک ایسا نہیں کیا ہے۔

اس کے ساتھ ہی انہوں نے ٹوئٹ کر کے کہا تھا، ’’ہم ایک نئے ہندوستان کی تعمیر تب تک نہیں کر سکتے جب تک ہمارے لاکھوں بھائی بہن غریبی میں زندگی گزار نے پر مجبور ہیں۔ اگر کانگریس اقتدار میں آتی ہے تو غریبی اور بھوک مٹانے کے لئے ہر غریب شخص کے لئے کم از کم آمدنی کی گارنٹی دینے کے لئے پُرعزم ہوگی، یہ ہمارا وعدہ ہے۔‘‘