وزیر اعلیٰ فڑنویس کر رہے ہیں کانگریس ارکان اسمبلی کو توڑنے کی سازش: اشوک چوہان

ویسے تو ان تمام ریاستوں سے یہ خبریں آ رہی ہیں کہ جہاں جہاں پر غیر بی جے پی حکومتیں ہیں وہاں کی حکومتوں کو کمزور کرنے کے لئے بی جے پی سازش رچ رہی ہے، وہاں کے ارکان اسمبلی کی خرید و فروخت کی خبریں گرم ہیں۔ مغربی بنگال میں تو خود امت شاہ اور بی جے پی کے سینئر رہنما انتخابات کے دوران کہہ چکے ہیں کہ ترنمول کے چالیس ارکان اسمبلی بی جے پی کے رابطہ میں ہیں۔ اس کے بعد ترنمول کے دو ارکان اسمبلی اور بائیں محاذ کا ایک رکن اسمبلی بی جے پی میں شامل بھی ہو گئے ہیں۔

اس کے علاوہ کرناٹک، راجستھان اور مدھیہ پردیش سے یہ خبریں روز آ رہی ہیں کہ وہاں بی جے پی کانگریس کے ارکان اسمبلی کو پارٹی بدلنے کے لئے راغب کر رہی ہے۔ اب خبر ایک ایسی ریاست سے آئی ہے جہاں پر بی جے پی کی حکومت ہے۔ مہاراشٹر کےوزیر اعلی دیوندر فڑنویس کانگریس کے ارکان اسمبلی کو توڑنے کی سازش رچ رہے ہیں۔

مہاراشٹر کے سابق وزیر اعلی اور ریاستی کانگریس کے سربراہ اشوک چوہان نے دیوندر فڑنویس پر الزام لگایا ہے کہ وہ کانگریس ارکان اسمبلی کو ذاتی طور پر فون کر رہے ہیں اور ان کو بی جے پی میں شامل ہونے کے لئے لالچ دے رہے ہیں۔ فڑنویس کے اس عمل سے ایسا محسوس ہو رہا ہے کہ مہاراشٹر میں ریاستی حکومت کے خلاف واضح ناراضگی ہے۔

واضح رہے لوک سبھا انتخابات میں بی جے پی کی کارکردگی مہاراشٹر میں اچھی رہی تھی لیکن مبصرین کی رائے میں اچھی کارکردگی کی وجہ وزیر اعظم نریندر مودی تھے لیکن ریاستی حکومت کے خلاف کافی ناراضگی ہے۔ فڑنویس کا کانگریس کے ارکان اسمبلی کو توڑنے کی سازش کے پیچھے یہ مقصد ہو سکتا ہے کہ وہ اسمبلی انتخابات سے قبل مہاراشٹر کے عوام کو یہ پیغام دینا چاہتے ہیں کہ ریاست میں کانگریس کمزور ہو گئی ہے اور اس کے رہنما پارٹی چھوڑ کر جا رہے ہیں۔