اروند کیجریوال کا استعفیٰ: عام آدمی پارٹی کا اہم اجلاس طلب، نئے وزیر اعلیٰ کے نام پر غور

نئی دہلی: دہلی کے وزیر اعلیٰ اروند کیجریوال کے استعفے کا اعلان پورے ملک میں سیاسی ہلچل کا سبب بن چکا ہے۔ آج، 17 ستمبر 2024 کو عام آدمی پارٹی (عآپ) نے اپنے تمام ارکان اسمبلی کی کا ایک اجلاس طلب کیا ہے، جس میں دہلی کے نئے وزیر اعلیٰ کے نام پر غور کیا جائے گا۔ کہا جا رہا ہے کہ کیجریوال کے استعفیٰ دینے سے پہلے ہی نئے وزیر اعلیٰ کا اعلان کر دیا جائے گا۔

رپورٹ کے مطابق یہ اجلاس آج صبح 11.30 بجے منعقد ہوگا، جس میں پارٹی کے ارکان اسمبلی اور سینئر قائدین شرکت کریں گے۔ امکان ہے کہ وزیر اعلیٰ اروند کیجریوال آج شام کو دہلی کے لیفٹیننٹ گورنر سے ملاقات کریں گے اور اپنا استعفیٰ باضابطہ طور پر پیش کریں گے۔

عام آدمی پارٹی کے قومی سیکریٹری پنکج گپتا نے اس اجلاس کی باضابطہ اطلاع جاری کر دی ہے۔ پارٹی نے پیر کے روز ایک اہم سیاسی امور کی کمیٹی (پی اے سی) کی میٹنگ بھی منعقد کی تھی، جس کی صدارت خود اروند کیجریوال نے کی تھی۔ اس میٹنگ میں دہلی کابینہ کے تمام وزراء شریک تھے، جہاں کیجریوال نے ان سے نئے وزیر اعلیٰ کے نام پر تبادلہ خیال کیا۔

پارٹی کے سینئر رہنما ساؤر بھاردواج نے پیر کو کہا کہ اروند کیجریوال نے ایک ایک رہنما سے مشاورت کے بعد نئے وزیر اعلیٰ کے انتخاب پر غور کیا ہے۔ ان کے مطابق، آج منعقد ہونے جا رہے اجلاس کے دوران کیجریوال اپنے استعفے کے حوالے سے تفصیلات پیش کریں گے اور نئے وزیر اعلیٰ کے انتخاب کے بارے میں مزید تبادلہ خیال ہوگا۔

دہلی کے نئے وزیر اعلیٰ کے حوالے سے کئی نام گردش میں ہیں۔ موجودہ وقت میں 4 اہم رہنما وزیر اعلیٰ کے عہدے کے مضبوط امیدوار مانے جا رہے ہیں:

آتشی: دہلی کابینہ کی ایک اہم وزیر ہیں اور ان کا نام بڑے زور و شور سے لیا جا رہا ہے۔

کیلاش گہلوت: موجودہ کابینہ میں ان کا اہم کردار ہے اور وہ وزیر اعلیٰ کے عہدے کے لیے مضبوط امیدوار تصور کیے جا رہے ہیں۔

گوپال رائے: دہلی میں پارٹی کے ایک تجربہ کار رہنما، جنہیں تنظیم سازی کا وسیع تجربہ ہے۔

سوربھ بھاردواج: موجودہ حکومت میں ایک اور اہم وزیر ہیں اور پارٹی کے اندرونی معاملات پر گہری نظر رکھتے ہیں۔

کیجریوال کے استعفے کے اعلان کے بعد بھارتیہ جنتا پارٹی (بی جے پی) نے عام آدمی پارٹی پر سخت تنقید کی ہے۔ دہلی بی جے پی کے ترجمان اور ایم ایل اے ابھے ورما نے کہا کہ عآپ کی حکومت میں شفافیت کی کمی ہے اور موجودہ اسکیموں کے حوالے سے کوئی واضح ہدایات نہیں ہیں۔

پارٹی کے اندرونی ذرائع کے مطابق، کیجریوال کی قیادت میں ہونے والی میٹنگ میں نئے وزیر اعلیٰ کے انتخاب کے بعد دہلی کی سیاست میں بڑی تبدیلیاں متوقع ہیں۔