اروند کیجریوال کو کل کرنی ہوگی خود سپردگی، عدالت سے پھر لگا جھٹکا

نئی دہلی: دہلی کی شراب پالیسی سے متعلق منی لانڈرنگ کیس میں وزیر اعلی اروند کیجریوال کو جھڑکا لگا ہے۔ راؤس ایونیو کورٹ نے ہفتہ (یکم جون 2024) کو کیجریوال کو 7 دن کی عبوری ضمانت کی مدت بڑھانے کی درخواست پر کوئی راحت نہیں دی۔ عدالت عبوری ضمانت کی اگلی سماعت 5 جون کو کرے گی۔

ای ڈی نے سماعت کے دوران عدالت کو بتایا کہ عام آدمی پارٹی (عآپ) کے قومی کنوینر کیجریوال نے حقائق کو چھپایا اور اپنی صحت سمیت کئی مسائل پر جھوٹے بیانات دیئے۔ اس کے جواب میں کیجریوال کے وکیل نے کہا کہ وہ (کیجریوال) بیمار ہیں اور انہیں علاج کی ضرورت ہے۔

سالیسٹر جنرل تشار مہتا نے کہا کہ اروند کیجریوال میڈیکل ٹیسٹ کرانے کے بجائے مسلسل ریلیاں کر رہے ہیں۔ اس کا مطلب ہے کہ کیجریوال کا سات کلو وزن کم کرنے کا دعویٰ جھوٹا ہے۔ تشار مہتا نے مزید دعویٰ کیا کہ کیجریوال کا وزن ایک کلو بڑھ گیا ہے۔ کیجریوال کے وکیل ہری ہرن نے کہا کہ ای ڈی یہ تجویز کرنے کی کوشش کر رہی ہے کہ جو شخص بیمار ہے یا جس کی طبی حالت خراب ہے اس کا کوئی علاج نہیں ہوگا؟

کیجریوال نے عبوری ضمانت میں توسیع کی درخواست کرتے ہوئے کہا کہ اچانک اور غیر واضح وزن میں کمی کے ساتھ کیٹون کی بلند سطح کے پیش نظر سی ٹی اسکین سمیت کئی طبی ٹیسٹ کروانے پڑتے ہیں۔ ایسی صورت حال میں ضمانت کی مدت میں سات دن کی توسیع کی جانی چاہیے۔

حال ہی میں سپریم کورٹ رجسٹری نے کیجریوال کی عرضی کو فوری طور پر درج کرنے سے انکار کر دیا تھا۔ رجسٹری نے کہا تھا کہ چونکہ کیجریوال کو باقاعدہ ضمانت کے لیے نچلی عدالت سے رجوع کرنے کی آزادی دی گئی ہے، اس لیے زیر بحث درخواست قابل سماعت نہیں ہے۔

سپریم کورٹ نے 10 مئی کو کیجریوال کو لوک سبھا انتخابات کے لیے یکم جون تک عبوری ضمانت دی تھی۔ عدالت نے کیجریوال کو 2 جون کو خودسپردگی کا حکم دیا تھا۔ ایسی صورت حال میں انہیں کل یعنی اتوار (2 جون 2024) کو سرینڈر کرنا ہوگا۔