جموں و کشمیر میں موسم سرما کی آمد، بالائی علاقوں میں برف باری، میدانی علاقوں میں بارشوں کا امکان

سری نگر: محکمہ موسمیات نے وادی کشمیر کے پہاڑی علاقوں میں کہیں کہیں ہلکی برف باری جبکہ میدانی علاقوں میں کہیں کہیں ہلکی بارشوں کی پیش گوئی کی ہے۔ خطہ جموں سمیت کئی علاقوں میں بھی بارش کے بعد سردی نے دستک دے دی ہے۔ جموں میں علی الصبح ہونے والی بارش کے بعد مطلع ابر آلود بنا ہوا ہے اور خطہ کے کئی اضلاع میں درجہ حرارت معمول سے 5 سے 6 ڈگری سیلسیس تک گر گیا ہے۔

متعلقہ محکمے کے ایک ترجمان نے بتایا کہ وادی میں اگلے چوبیس گھنٹوں کے دوران پہاڑی علاقوں خاص کر کپوارہ اور ٹنگڈار کے شمال مغربی علاقوں میں کہیں کہیں ہلکی برف باری جبکہ میدانی علاقوں میں ہلکی بارشوں کا امکان ہے۔

انہوں نے کہا کہ تاہم اس کے بعد موسم میں تبدیلی واقع ہوسکتی ہے اور پھر 13 اکتوبر سے 18 اکتوبر تک موسم مجموعی طور پر خشک رہنے کی توقع ہے۔ ادھر وادی میں گلمرگ کو چھوڑ کر شبانہ درجہ حرارت معمول سے زیادہ ریکارڈ ہو رہا ہے۔ گرمائی دارلحکومت سری نگر میں کم سے کم درجہ حرارت 10.6 ڈگری سینٹی گریڈ ریکارڈ کیا گیا جو معمول سے 3.3 ڈگری سینٹی گریڈ زیادہ ریکارڈ ہوا تھا۔

وادی کے مشہور زمانہ سیاحتی مقام گلمرگ میں کم سے کم درجہ حرارت 3.4 ڈگری سینٹی گریڈ ریکارڈ کیا گیا جو معمول سے 1.3 ڈگری سینٹی گریڈ کم ریکارڈ ہوا تھا۔ وادی کے دوسرے مشہور سیاحتی مقام پہلگام میں کم سے کم درجہ حرارت 6.0 ڈگری سینٹی گریڈ ریکارڈ کیا گیا جو معمول سے 2.4 ڈگری سینٹی گریڈ زیادہ ریکارڈ ہوا تھا۔

سرحدی ضلع کپوارہ میں کم سے کم درجہ حرارت 10.6 ڈگری سینٹی گریڈ ریکارڈ کیا گیا جو معمول سے 4.2 ڈگری سینٹی گریڈ زیادہ ریکارڈ ہوا تھا۔ گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 7.0 ڈگری سینٹی گریڈ ریکارڈ کیا گیا جو معمول سے 2.5 ڈگری سینٹی گریڈ زیادہ ریکارڈ ہوا تھا۔