ضمانت کی عرضی مسترد ہونے پر ارنب گوسوامی پہنچے سپریم کورٹ، کل ہوگی سماعت

نئی دہلی: خودکشی کے لئے اکسانے کے معاملے میں بامبے ہائی کورٹ سے عبوری ضمانت مسترد ہونے کے بعد ریپبلک ٹی وی کے ایڈیٹر ان چیف ارنب گوسوامی نے سپریم کورٹ سے رجوع کیا ہے۔ گوسوامی نے منگل کے روز بامبے ہائی کورٹ کے فیصلے کو چیلنج کرتے ہوئے عدالت عظمی میں ایک عرضی دائر کی ہے۔ سپریم کورٹ اس معاملہ میں کل یعنی بدھ کے روز سماعت کرنے جا رہی ہے۔

سنہ 2018 میں خود کشی کے لئے اکسانے کے معاملے میں ارنب گوسوامی کی ضمانت کی عرضی مہاراشٹر کی سیشن کورٹ میں زیر سماعت ہے لیکن اس دوران گوسوامی نے ضمانت کے لئے سپریم کورٹ سے رجوع کیا ہے۔

اس سے پہلے بامبے ہائی کورٹ نے اتوار کے روز ریپبلک ٹی وی کے ایڈیٹر ارنب گوسوامی اور دو دیگران کو عبوری ضمانت دینے سے انکار کرتے ہوئے کہا تھا کہ انہیں اس کے لئے سیشن کورٹ سے رجوع کرنا چاہیے۔ پولیس نے اپنی عرضی میں مجسٹریٹ کے اس حکم کو چیلنج کیا ہے جس میں مجسٹریٹ نے ارنب کو پولیس حراست میں بھیجنے سے انکار کرتے ہوئے 18 نومبر تک عدالتی حراست میں بھیج دیا تھا۔

ایک انٹیریر ڈیزائنر اور اس کی ماں کو 2018 میں مبینہ طور پر خود کشی کے لئے اکسانے کے معاملہ میں ریپبلک ٹی وی کے چیف ایڈیٹر ارنب گوسوامی نے منگل کے روز عبوری ضمانت کے لئے سپریم کورٹ میں عرضی دائر کر کی ہے۔