ججوں کی ریٹائرمنٹ کے بعد تقرری عدلیہ کے لیے خطرہ: کانگریس

نئی دہلی: آندھرا پردیش کے گورنر کے طور پر، ایس عبدالنذیر کی تقرری کے بعد کانگریس نے اتوار کو کہا کہ 'یہ عدلیہ کے لیے خطرہ ہے'۔ کانگریس لیڈر ابھیشیک منو سنگھوی نے سابق وزیر قانون اور خزانہ آنجہانی ارون جیٹلی کا حوالہ دیا۔ جیٹلی نے 2013 میں کہا تھا، ریٹائرمنٹ سے پہلے کے فیصلے ریٹائرمنٹ کے بعد کی ملازمتوں اور عدلیہ کے لیے اس کے خطرے سے متاثر ہوتے ہیں۔

منو سنگھوی نے کہا، ہم بھی یہی جذبات رکھتے ہیں، یہ عدلیہ کے لیے خطرہ ہے۔ انہوں نے کہا کہ یہ کسی خاص شخص کے بارے میں نہیں ہے کیونکہ میں انہیں ذاتی طور پر جانتا ہوں لیکن اصولی طور پر ہم ججوں کی ریٹائرمنٹ کے بعد تقرری کے خلاف ہیں۔ سنگھوی نے کہا کہ بی جے پی کا دفاع میں یہ کہنا کہ یہ پہلے ہو چکا ہے، یہ کوئی بہانہ نہیں ہو سکتا اور مسئلہ جوں کا توں ہے۔ کانگریس کے رکن پارلیمنٹ اور مواصلات کے انچارج جنرل سکریٹری جے رام رمیش نے ارون جیٹلی کا ویڈیو کلپ شیئر کیا اور کہا کہ پچھلے 3-4 سالوں میں اس کے کافی ثبوت ہیں۔

رنجن گوگوئی کے بعد یہ دوسری تقرری ہے۔ جسٹس ایس عبدالنذیر جو ایودھیا کیس میں سپریم کورٹ کی پانچ رکنی بنچ کا حصہ تھے اور وہ جنوری میں ریٹائر ہوئے ہیں۔ جسٹس نذیر کی سربراہی میں ایک آئینی بنچ نے 2016 کے نوٹ بندی کے عمل کو صحیح قرار دیا تھا۔ انہوں نے یہ بھی اعلان کیا کہ وزراء، ارکان پارلیمنٹ، ایم ایل ایز اور قائدین کی آزادی اظہار پر اضافی پابندیاں عائد کرنے کی ضرورت نہیں ہے۔

جسٹس نذیر کی پیدائش 5 جنوری 1958 کو کرناٹک کے جنوبی کنڑ ضلع کے بیلوائی میں ہوئی۔ جسٹس نذیر نے قانون کی ڈگری حاصل کرنے کے بعد کرناٹک ہائی کورٹ میں پریکٹس کی اور 12 مئی 2003 کو بطور ایڈیشنل جج مقرر ہوئے۔ وہ 24 ستمبر 2004 کو مستقل جج بنے اور 17 فروری 2017 کو سپریم کورٹ میں تعینات ہوئے۔

جسٹس نذیر کئی تاریخی آئینی بنچ کے فیصلوں کا حصہ تھے، جن میں تین طلاق، پرائیویسی کا حق، ایودھیا کیس اور حال ہی میں نوٹ بندی اور پارلیمنٹیرینز کی تقریر کی آزادی پر مرکز کا 2016 کا فیصلہ شامل ہے۔ جسٹس نذیر نے کہا کہ آج ہندوستانی عدلیہ کی حالت اتنی خراب نہیں ہے جتنی پہلے تھی، حالانکہ غلط معلومات کی وجہ سے غلط فہمی کا اظہار کیا جاتا ہے۔