عتیق-اشرف کے قاتلوں کی پیشی، سڑک سے کمرہ عدالت تک حفاظت کے پختہ انتظامات

لکھنؤ: مافیا اور لیڈر عتیق احمد اور اس کے بھائی اشرف علی کے قتل کے ملزمان کو آج عدالت میں پیش کیا جائے گا۔ تینوں قتل کے ملزمان لولیش تیواری، سنی سنگھ اور ارون موریہ کو لے کر ایس آئی ٹی پرتاپ گڑھ جیل سے نکل چکی ہے، جہاں یہ قید تھے۔

خیال رہے کہ تینوں ملزمان کو پہلے الہ آباد کی نینی جیل میں قید کیا گیا تھا لیکن عتیق کے حامیوں کے خود کے سبب انہیں پیر کے روز پرتاپ گڑھ جیل میں منتقل کر دیا گیا تھا۔ آج انہیں پرتاپ گڑھ کی جیل سے عدالت لے جایا جائے گا۔ اس دوران چپہ چپہ پر حفاظت کے سخت انظامات کیے گیے ہیں۔ حفاظت کے لیے آر اے ایف اور پی اے سی کے جوانوں کو تعینات کیا گیا ہے۔

خیال رہے کہ عتیق احمد اور اشرف علی کو 15 اپریل کو اس وقت گولیوں سے چھلنی کر کے قتل کر دیا گیا تھا جب انہیں طبی معائنہ کے لیے اسپتال لے جایا جا رہا تھا۔ جس وقت دنوں کو گولیوں کا نشانہ بنایا گیا وہ کیمرے پر لائیو تھے اور صحافیوں سے بات کر رہے تھے۔ قتل کے تینوں ملزمان بھی صحافیوں کا ہی روپ دھار کر وہاں پہنچے تھے۔ عتیق اور اشرف کو قتل کرنے کے بعد قاتلوں نے مبینہ طور پر ’جے شری رام‘ کے نعرے بھی لگائے تھے۔ پولیس نے ملزمان کو موقع سے ہی گرفتار کر لیا تھا۔