’48 گھنٹے میں معافی مانگو ورنہ...‘، عآپ رکن پارلیمنٹ سنجے سنگھ نے ای ڈی کو بھجوایا ہتک عزتی کا نوٹس

عآپ کے سرکردہ لیڈر اور رکن پارلیمنٹ سنجے سنگھ نے ہفتہ کے روز ای ڈی افسران کو ہتک عزتی کا نوٹس بھجوایا ہے۔ یہ نوٹس ای ڈی کے ڈائریکٹر سنجے کمار مشرا اور مبینہ آبکاری گھوٹالہ معاملہ کی جانچ کر رہے تحقیقاتی افسر جوگندر کو بھیجا گیا ہے۔ بھیجے گئے نوٹس میں سنجے سنگھ نے افسران سے 48 گھنٹے کے اندر معافی مانگنے کے لیے کہا ہے، ورنہ قانونی کارروائی کے لیے تیار رہنے کا مشورہ دیا ہے۔

سنجے سنگھ کا دعویٰ ہے کہ ای ڈی نے آبکاری معاملہ میں غلط طریقے سے ان کا نام چارج شیٹ میں ڈال دیا ہے، جبکہ کسی گواہ نے ان کا نام نہیں لیا۔ سنجے سنگھ کا کہنا ہے کہ ’’بغیر کسی گواہ کے ذریعہ میرا نام لیے کیس میں میرا نام ہونا اس بات کا اشارہ ہے کہ ای ڈی نے مجھے بدنام کرنے کے لیے ایک سازش کے تحت میرا نام اپنی کمپلینٹ میں ڈالا ہے۔ جبکہ میرے خلاف نہ تو کوئی گواہ ہے، نہ ہی ثبوت۔‘‘

قابل ذکر ہے کہ عآپ لیڈر سنجے سنگھ نے جمعرات کو کہا تھا کہ دہلی آبکاری گھوٹالہ معاملے کے فرد جرم میں فرضی طریقے سے نام شامل کرنے کو لے کر ای ڈی افسران کے خلاف مجرمانہ ہتک عزتی کا مقدمہ داخل کریں گے۔ اپنے اس بیان پر ایک قدم آگے بڑھتے ہوئے آج سنجے سنگھ نے ای ڈی افسران کو معافی مانگنے کا نوٹس بھجوا دیا ہے۔ 48 گھنٹے کے اندر اگر معافی نہیں مانگی جاتی تو عآپ لیڈر قانونی کارروائی کی طرف قدم بڑھائیں گے۔