اے پی گیس سانحہ: ’متاثرین کو معاوضہ اور کمپنی کے خلاف سخت کارروائی ہو‘

وشاکھاپٹنم: سی پی آئی کے قومی سکریٹری کے نارائنا نے بیشتر دیگر یونین کے لیڈروں کے ساتھ ایل جی پولی مرس کمپنی کے خلاف گیس سانحہ کے سلسلہ میں کارروائی کا مطالبہ کیا۔ اپنے بیان میں نارائنا نے مطالبہ کیا کہ حکومت فوجداری معاملہ کمپنی کے انتظامیہ کے خلاف درج کرے۔ انہوں نے مطالبہ کیا کہ مرنے والے ہر فرد کے اہل خانہ کو 25 لاکھ روپئے ایکس گریشیا دیا جائے اور متاثرین کا مفت علاج کروایا جائے۔ بیشتر ٹریڈ یونینوں کے لیڈروں نے بھی اس کمپنی کو بند کرنے کا مطالبہ کیا ہے۔

زہریلی گیس سے متاثرہ افراد کو معاوضہ دے حکومت: سیٹو

مزدور تنظیم سینٹر فار ٹریڈ يونين (سیٹو) نے آندھرا پردیش کے وشاکھاپٹنم کے قریب ایک فیکٹری میں زہریلی گیس رِسنے سے متاثرہ لوگوں کو معاوضہ دینے اور متعلقہ کمپنی کے خلاف کارروائی کرنے کا مطالبہ کیا ہے۔

سیٹو کے جنرل سکریٹری تپن سین نے جمعرات کو یہاں جاری ایک بیان میں کہا کہ اس حادثے کے لئے جنوبی کوریا کی ملٹی نیشنل کمپنی ایل جی پالی مر مکمل طور پر ذمہ دار ہے۔ انہوں نے کہا کہ حادثے کے وقت گیس کے دو ٹینکروں پر کوئی بھی شخص نگرانی کیلئے موجود نہیں تھا۔ ان میں 5000 ٹن گیس بھری تھی۔ ان کی حفاظت میں لاپرواہی برتی گئی ہے۔

سین نے کہا کہ کمپنی کے ساتھ رعایت نہیں برتی جانی چاہیے اور اس کے خلاف سخت کارروائی کی جانی چاهيے۔ انہوں نے کہا کہ متاثرہ کنبے کو 50- 50 لاکھ روپے کا معاوضہ دلایا جانا چاہیے۔ اس کے علاوہ علاج کا مکمل خرچ کمپنی سے وصول کیا جانا چاہیے۔ انہوں نے کہا کہ پورے حادثے کی غیر جانبدار اور آزاد جانچ ہونی چاہیے۔