کوارنٹائن سنٹر میں ایک اور خودکشی، بہار میں نوجوان نے چھت سے لگائی چھلانگ

کوارنٹائن سنٹر میں خودکشی کے کئی معاملے سامنے آ چکے ہیں اور اب بہار کے گیا واقع کوارنٹائن سنٹر میں ایک نوجوان کے ذریعہ خودکشی کیے جانے کی خبر سامنے آ رہی ہے۔ میڈیا ذرائع سے موصول ہو رہی خبروں کے مطابق بہار میں گیا ضلع کے بودھ گیا تھانہ علاقہ واقع کوارنٹائن سینٹر میں جمعہ کو ایک نوجوان نے چھت سے چھلانگ لگا کر خود کشی کرلی۔

اس خودکشی واقعہ کے تعلق سے پولس کا کہنا ہے کہ "گوپال گنج ضلع کے چھتیا گاؤں باشندہ گوری شنکر پرساد کا بیٹا وکی کمار 3 جون کو وندے بھارت مشن کے تحت خصوصی فلائٹ سے سعودی عرب کے شہر جدہ سے گیا ایئر پورٹ آیا ۔ بعد ازاں اسے بودھ گیا کے نگما مونٹیسری میں بنائے گئے کوارنٹائن سینٹر میں رکھا گیا ۔ آج وکی نے کوارنٹائن سینٹر کی چھت سے چھلانگ لگا کر خود کشی کرلی ۔" پولس کا کہنا ہے کہ فی الحال خودکشی کی وجہ واضح نہیں ہو پائی ہے اور معاملے کی جانچ کی جا رہی ہے۔

مقامی پولس نے وکی کمار کی لاش کو اپنے قبضے میں لے کر اسے پوسٹ مارٹم کے لیے انوگرہ نارائن مگدھ میڈیکل کالج اسپتال بھیج دیا ہے۔ دریں اثناء مگدھ ڈویژنل کمشنر اسنگ با چوبا آؤ نے اس واقعہ کو سنجیدگی سے لیا ہے۔ انہوں نے پورے معاملے کی تحقیقات کا حکم جاری کر دیا ہے۔

(یو این آئی ان پٹ کے ساتھ)