تلنگانہ بی جے پی کو ایک اور جھٹکا، سابق رکن پارلیمنٹ ویویک وینکٹاسوامی کانگریس میں شامل

حیدرآباد: تلنگانہ میں اسمبلی انتخابات سے قبل بی جے پی کو اس وقت ایک اور جھٹکا لگا جب سابق رکن پارلیمنٹ اور پارٹی کے قومی ایگزیکٹیو ممبر جی وویک وینکٹاسوامی نے بدھ کو پارٹی سے استعفیٰ دے دیا اور کانگریس میں شامل ہو گئے۔ ویویک نے تلنگانہ بی جے پی کے صدر جی کشن ریڈی کو لکھے اپنے خط میں لکھا ’’بھاری دل کے ساتھ میں بھارتیہ جنتا پارٹی سے اپنا استعفیٰ پیش کرتا ہوں۔‘‘

بعد ازاں ویویک نے یہاں شمش آباد کے نووٹیل ہوٹل میں کانگریس لیڈر راہل گاندھی سے ملاقات کی اور پارٹی میں شمولیت اختیار کر لی۔ سابق رکن پارلیمنٹ نے اپنے بیٹے وامسی کرشنا کے ساتھ راہل گاندھی سے ملاقات کی جو اس وقت تلنگانہ میں پارٹی کے لیے مہم چلا رہے ہیں۔ اس موقع پر تلنگانہ پردیش کانگریس کمیٹی (ٹی پی سی سی) کے صدر اے ریونت ریڈی اور دیگر قائدین موجود تھے۔

ریونت ریڈی نے نامہ نگاروں کو بتایا کہ ویویک کی شمولیت سے کانگریس پارٹی کو بھارت راشٹرا سمیتی (بی آر ایس) کو اقتدار سے ہٹانے کے کام میں مزید تقویت ملے گی۔ ویویک نے کہا کہ وہ کسی عہدہ یا ٹکٹ کے لیے نہیں بلکہ کے سی آر حکومت کو اقتدار سے بے دخل کرنے کے لیے کانگریس میں شامل ہوئے ہیں۔

ویویک نے الزام لگایا کہ گزشتہ 10 سالوں سے کے سی آر حکومت عوام کی بہبود کے لیے نہیں بلکہ اپنے خاندان کے لیے کام کر رہی ہے۔ انہوں نے کہا ’’سب کو اکٹھے ہونے اور اس خراب حکمرانی کو ختم کرنے کی ضرورت ہے۔" پچھلے کئی ہفتوں سے یہ قیاس آرائیاں کی جا رہی تھیں کہ وویک کانگریس پارٹی میں واپسی کا منصوبہ بنا رہے ہیں۔