اڈیشہ میں پھر ریل حادثہ، مال بردار ٹرین کی بوگی میں لگی آگ

بھونیشور: اوڈیشہ کے بالاسور میں ایک بار پھر ٹرین حادثے کی خبر ہے۔ اطلاعات کے مطابق بالاسور ضلع کے روپسا ریلوے اسٹیشن پر مال بردار ٹرین کے ایک ڈبے میں آگ لگ گئی۔ آگ لگنے کی وجہ کا ابھی تک پتہ نہیں چل سکا ہے۔ غنیمت ہے کہ فائر بریگیڈ کے عملے نے بروقت آگ پر قابو پا لیا۔

بتایا جا رہا ہے کہ کوئلے سے لدی مال بردار ٹرین روپسا ریلوے اسٹیشن پر کھڑی تھی۔ ریلوے ملازمین نے ہفتہ کی صبح بوگی سے دھواں نکلتے دیکھا۔ جس کے بعد انہوں نے فوری طور پر بالیشور فائر ڈیپارٹمنٹ کو اطلاع دی۔ اطلاع پر فائر بریگیڈ کی ٹیم نے پہنچ کر آگ پر قابو پا لیا۔ بھونیشور برہم پور میمو ٹرین نمبر 08441 اس وقت پلیٹ فارم نمبر ایک سے گزر رہی تھی جب مال بردار گاڑی کے ایک ڈبے میں آگ لگی۔

تاہم، ٹرین ڈرائیور نے کوئلہ سے لدی ٹرین کے ویگن نمبر 14 سے دھواں نکلتا ہوا دیکھا اور فوری طور پر بالوگاؤں اسٹیشن ماسٹر اور آر پی ایف حکام کو اطلاع دی۔ ریلوے نے معاملے کی جانچ شروع کر دی ہے۔ خیال رہے کہ بالاسور کے بہانگا اسٹیشن پر ہونے والے خوفناک ٹرین حادثے میں 275 سے زیادہ لوگوں کی جانیں چلی گئی تھیں۔ اس ٹرین حادثے میں 900 سے زیادہ لوگ زخمی ہوئے، کئی متاثرین اب بھی اپنی زندگی کے لیے جنگ لڑ رہے ہیں۔