گجرات سے پھر آئی بچی کے ساتھ عصمت دری کی خبر، شمالی ہندوستان کے لوگ خوفزدہ

گجرات کے سابر کانٹھا میں حال ہی میں ڈیڑھ سالہ بچی کی عصمت دری کا معاملہ سامنے آیا تھا جس کے بعد پورے گجرات میں شمالی ہندوستان کے مزدوروں کے خلاف جو ماحول بنا تھا اس سے خوفزدہ ہو کر بڑی تعداد میں مزدوروں نے گجرات چھوڑکر بھاگنا شروع کر دیا تھا، ابھی سابر کانٹھا کی آگ ٹھنڈی بھی نہیں ہوئی تھی کہ سورت سے ایک معاملہ سامنے آیا ہے جس میں ایک ساڑھے 3سالہ بچی کے ساتھ منہ کالا کرنے کی خبر آئی ہے۔ معاملہ کی سنجیدگی کو دیکھتے ہوئے پولس ہر طرح کے حالات سے نمٹنے کے لئے پوری طرح تیار ہے۔ ملزم ابھی پولس گرفت سے باہر ہے لیکن پولس نے معاملہ درج کر کے ملزم کی تلاش شروع کر دی ہے۔

ذرئع کے مطابق سورت میں ایک گھر کے باہر ساڑھے 3 سالہ بچی کھیل رہی تھی ۔ الزام ہے کہ پڑوس میں رہنے والا انل نامی شخص اسے اپنے ساتھ لے گیا اور اس کے ساتھ منہ کالا کیا ۔ ملزم نے عصمت دری کے بعد بچی کو قتل بھی کر دیا۔ والدین نے جب بچی کو ڈھونڈنا شروع کیا تو پاس کے ایک مکان سے اس کی لاش ملی ، واقعہ کی خبر پولس کو دی گئی ، پولس جائے وقوعہ پر پہنچ کر لاش کو اپنے قبضہ میں لے کر پوسٹ مارٹم کے لئے بھیج دیا۔ ذرئع کے مطابق پولس نے انل یادو نام شخص کی تلاش شروع کر دی ہے جو فرار بتایا جا رہا ہے ۔ پولس اس بات کو لے کر پریشان ہے کہ معاملہ کہیں پھر شمالی ہندوستان بنام گجراتی نہ ہو جائے۔