صرف کھانا اور آبادی بڑھانا، یہ کام تو جانور بھی کرتے ہیں: موہن بھاگوت

نئی دہلی: آر ایس ایس (راشٹریہ سوم سیوک سنگھ) نے ایک بیان میں کہا ہے کہ انسان کی کئی ذمہ داریاں ہوتی ہیں اور وقت وقت ان کو پورا کرتے رہنا چاہئے۔ موہن بھاگوت سری ستیہ سائیں یونیورسٹی فار ہیومن ایکسیلنس کی تقریب تقسیم اسناد سے خطاب کر رہے تھے۔

موہن بھاگوت نے واضح الفاظ میں کہا کہ صرف زندہ رہنا ہی زندگی کا مقصد نہیں ہونا چاہئے۔ انسان کی انسان کی کئی ذمہ داریاں ہوتی ہیں اور وقت وقت ان کو پورا کرتے رہنا چاہئے۔ انہوں نے کہا کہ صرف کھانا اور آبادی بڑھانا، یہ کام تو جانور بھی کر سکتے ہیں۔ طاقت ور ہی زندہ رہے گا یہ تو جنگل کا اصول ہے۔ جبکہ طاقت ور اگر دوسروں کی حفاظت کرے تو یہ انسان ہونے کی نشانی ہے۔

خیال رہے کہ ملک میں ان دنون آبادی پر بحث جاری ہے۔ حال ہی میں یو این کی ایک رپورٹ میں کہا گیا ہے کہ ہندوستان جلد ہی آبادی کے معاملہ میں چین کو پیچھے چھوڑ دے گا۔ دریں اثنا یوپی کے وزیر اعلیٰ یوگی آدتیہ ناتھ نے آبادی کو ایک مذہب کا مسئلہ قرار دینے کی کوشش کی، جس پر کافی لوگوں نے اعتراض ظاہر کیا۔

موہن بھاگوت نے اپنے بیان میں ہندوستان کی ترقی پر بھی بات کی۔ انہوں نے کہا کہ گزشتہ کچھ سالوں میں ہندوستان نے کافی ترقی کی ہے۔ انہوں نے کہا کہ آج جو ترقی نظر آ رہی ہے اس کی بنیاد 1857 میں رکھی گئی تھی اور بعد میں ویویکانند نے اپنے نظریات سے اسے فروغ دیا۔