آندھرا پردیش: تروپتی واقع ترومالا ونکٹیشور مندر میں بھگدڑ، 3 عقیدتمند زخمی

آندھرا پردیش واقع ترومالا ونکٹیشور مندر میں آج عیقدتمندوں کی زبردست بھیڑ دیکھنے کو مل رہی ہے۔ اس بھیڑ کی وجہ سے وہاں بھگدڑ جیسے حالات پیدا ہو گئے ہیں۔ مشکل صورت حال کا اندازہ اسی بات سے لگایا جا سکتا ہے کہ اب تک تین عقیدتمند زخمی ہو گئے ہیں۔ موصولہ اطلاعات کے مطابق یہ عقیدتمند ’سرو درشنم ٹکٹ‘ لینے پہنچے تھے اور ٹکٹ کاؤنٹر پر زبردست بھیڑ کی وجہ سے وہ حادثے کا شکار ہو گئے۔

ٹی ٹی ڈی کے پی آر او روی کمار کا کہنا ہے کہ تروپتی کے تینوں ٹکٹ کاؤنٹر پر آج کافی بھیڑ تھی۔ بھگدڑ جیسے حالات ہونے کے بعد ترومالا تروپتی دیوستھانم نے طے کیا کہ عقیدتمندوں کو بغیر ٹکٹ کے دَرشن کے لیے جانے دیا جائے۔ فی الحال حالات قابو میں ہیں۔

واضح رہے کہ ’سرو دَرشنم‘ سے یہاں مطلب ’سب کو دَرشن‘ سے ہے۔ ترومالا تروپتی دیوستھانم اس کے تحت عقیدتمندوں کو مفت دَرشن کی سہولت دیتی ہے۔ ہفتے کے الگ الگ دن ’سرو دَرشنم‘ کی ٹائمنگ میں بدلاؤ ہوتا رہتا ہے۔ اس میں نمبر آنے میں باقی دَرشن کے طریقوں سے زیادہ وقت لگتا ہے۔ قابل ذکر یہ بھی ہے کہ کورونا بحران میں ترومالا ونکٹیشور ٹیمپل کو بھی عقیدتمندوں کے لیے بند کیا گیا تھا۔ اسی سال 14 مارچ کو وہاں کورونا پابندیوں کو ختم کیا گیا ہے۔