دہلی سے پیرس کے لیے روانہ ایئر انڈیا فلائٹ کی آدھے گھنٹے بعد ہی ایمرجنسی لینڈنگ، 220 مسافروں کی جان حلق میں

دہلی کے اندرا گاندھی انٹرنیشنل ہوائی اڈے (آئی جی آئی اے) پر جمعہ کے دن اس وقت ایک افرا تفری کا ماحول پیدا ہو گیا، جب خبر ملی کہ دہلی سے پیرس کے لیے روانہ ہوئی ایئر انڈیا کی فلائٹ اپنی پرواز کے نصف گھنٹے بعد ہی ایمرجنسی لینڈنگ کرنے والی ہے۔ ایمرجنسی لینڈنگ کی خبر ملتے ہی ایئرپورٹ انتظامیہ نے سبھی ضروری انتظامات کرنے شروع کر دیے۔ فائر بریگیڈ سے لے کر دیگر سبھی شعبوں کو الرٹ کیا گیا تاکہ کسی بھی انہونی سے بچا جا سکے۔

میڈیا رپورٹس کے مطابق دہلی سے پیرس کے لیے روانہ ایئر انڈیا کے طیارہ میں تقریباً 220 مسافر سوار تھے، اور ایمرجنسی لینڈنگ کی خبر سے سبھی کی جان حلق میں آ گئی تھی۔ حالانکہ آئی جی آئی ایئرپورٹ پر طیارے کی سخت سیکورٹی کے درمیان محفوظ لینڈنگ ہوئی اور سبھی مسافروں کی جان بچ گئی۔

طیارے کی ایمرجنسی لینڈنگ کی وجہ کے بارے میں بتایا جا رہا ہے کہ پائلٹ کو ٹائر سے متعلق کچھ اندیشے ہوئے تھے۔ کہا جا رہا ہے کہ ایئر انڈیا کی فلائٹ جب دہلی ایئرپورٹ سے پیرس کے لیے روانہ ہوئی تو کچھ ہی دیر بعد پائلٹ کو محسوس ہوا کہ طیارہ کا ٹائر پھٹ سکتا ہے۔ یہ جانکاری پائلٹ نے آئی جی آئی انتظامیہ کو دی، اور پھر نصف گھنٹے کے اندر ہی فلائٹ واپس آ گئی اور اس کی ایمرجنسی لینڈنگ ہوئی۔