اے ایم یو کے طلبا کا آن لائن امتحان سے قبل ہاسٹل چھوڑنے سے انکار

علی گڑھ: علی گڑھ مسلم یونیورسٹی (اے ایم یو) کے آن لائن امتحان کرانے کے فیصلہ کے حوالہ سے کئی مسائل پیدا ہو رہے ہیں۔ ایک پروفیسر کی طرف سے فیصلہ کے خلاف کھل کر سامنے آنے کے بعد ہاسٹل میں قیام کر رہے طلبا نے یہ کہہ کر ہاسٹل خالی کرنے سے انکار کر دیا ہے کہ اپنے آبائی اضلاع میں پہنچنے پر انہیں انٹرنیٹ کنکٹیوٹی کا مسئلہ پیش آئے گا۔

موجودہ وقت میں ہاسٹل میں تقریباً 800 طلبا قیام پزیر ہیں اور یونیورسٹی انتظامیہ نے انہیں گرمی کی تعطیل اور کورونا کی صورت حال کے پیش نظر 15 جون تک اپنا ہاسٹل خالی کرنے کے لئے کہا تھا۔ طلبا کا دعوی ہے کہ انہوں نے افسران کو موجودہ حالات میں ہاسٹل نہ چھوڑ پانے کی اپنی مجبوری کے بارے میں تحریری طور پر اطلاع دی تھی لیکن اس کا کوئی فائدہ نہیں ہوا۔

ایک طالب علم ارشد نے کہا، ’’میں مغربی بنگال میں رہتا ہوں اور وہاں گردابی طوفان امفان کی وجہ سے ابھی انٹرنیٹ کنکٹیوٹی نہیں ہے۔ اگر میں واپس چلا جاتا ہوں تو شائد امتحان نہیں دے پاؤں گا یا کنکٹیڈ نہیں رہ پاؤں گا۔‘‘ انہوں نے کہا کہ کشمیر کے طلبا کے ساتھ بھی اسی طرح کا مسئلہ ہے۔

واضح رہے کہ اے ایم یو نے 10 جولائی کے بعد آن لائن اوپن بک امتحان کرانے کا منصوبہ بنایا ہے۔ اے ایم یو کے پراکٹر محمد وسیم علی نے کہا، ’’کسی بھی طالب علم کو ہاسٹل خالی کرنے کے لئے مجبور نہیں کیا جا رہا ہے۔ یہ صرف ایک صلاح تھی۔‘‘