گرفتاری کے وقت امرت پال کے سر پر پگڑی، کمر میں کرپان  نظر آ رہی تھی

پنجاب پولیس نے خالصتان کے حامی امرت پال سنگھ کو 36 دن بعد گرفتار کر لیا ہے۔ پولیس نے امرت پال کو موگا کے روڈوال گوردوارہ سے گرفتار کیا ہے۔ نیوز پورٹل ’ آج تک‘ کے مطابق  ان کی گرفتاری کے وقت کی تصویر منظر عام پر آئی ہے، جس میں وہ سر پر پگڑی، کمر میں کرپان اور ننگے پاؤں یعنی مکمل طور پر نہنگ کا لباس پہنے ہوئے نظر آ رہے ہیں۔

پنجاب پولیس نے ٹویٹ کیا کہ امرت پال سنگھ کو موگا سے گرفتار کیا گیا ہے۔ اس کے ساتھ ہی پولیس نے لوگوں سے اپیل کی ہے کہ وہ کسی بھی قسم کی افواہوں سے گریز کریں اور امن و امان برقرار رکھیں۔ اس سے پہلے بتایا گیا تھا کہ امرت پال نے موگا کے رودیوال گوردوارہ میں خودسپردگی کی ہے۔

پورٹل پر شائع خبر کے مطابق امرت پال سنگھ نے گرفتاری سے قبل روڈوال گوردوارہ میں ایک خطبہ بھی دیا تھا جس میں وہ کہہ رہا تھا کہ یہ انتہا نہیں بلکہ آغاز ہے۔ اس نے گرودوارے میں تبلیغ کے بعد پولیس کے سامنے خودسپردگی کی۔ بتایا جا رہا ہے کہ امرت پال ہفتہ کی شام سے گرودوارے میں چھپا ہوا تھا۔ جس کی اطلاع سابق جتھیدار جسبیر سنگھ کی جانب سے پولیس کو دی گئی۔ امرت پال کو پولس نے اتوار کی صبح 7 بجے اپنی تحویل میں لے لیا ہے۔ اسے امرتسر لایا گیا ہے اور خبر گشت کر رہی ہے کہ وہاں سے اسے بٹھنڈہ ہوائی اڈے سے پرواز کے ذریعے آسام کی ڈبرو گڑھ جیل بھیج دیا جائے گا۔