امراوتی:لو ٹرائینگل کا خطرناک انجام، ایک معشوقہ نے دوسری کا گلا کاٹ کر کیا قتل

 مہاراشٹر کے امراوتی میں لو ٹرائینگل میں قتل کا ایک سنسنی خیز معاملہ سامنے آیا ہے۔ یہاں ایک لڑکے کا دو لڑکیوں کے ساتھ معاشقہ چل رہا تھا۔ یہ بات جب کھل کرسامنے آئی تو دونوں لڑکیوں میں تنازع ہو گیا اور یہ معاملہ اس حد تک بڑھ گیا کہ سیما نام کی لڑکی نے شبھانگی نامی لڑکی کے گلے اور ہاتھ میں چھُری سے حملہ کرکے اسے قتل کر دیا۔ امراوتی میں گزشتہ 36 گھنٹے میں یہ چوتھی قتل کی واردات ہے۔ اس قتل کے بعد پورے علاقے میں ہنگامہ مچ گیا ہے۔

نیوز پورٹل ’آج تک‘ پر شائع خبر کے مطابق یہ واقعہ امراوتی کے راجا پیٹھ پولیس تھانے کی نئی بائی پاس کے قریب پیش آیا۔ پولیس نے بتایا کہ مہلوک لڑکی 26 سالہ شبھانگی وردھا ضلع کے آروی کی رہنے والی تھی۔ وہ دو دن پہلے امراوتی میں اپنی سہیلی کے یوم پیدائش کے موقع پر آئی تھی۔ یہاں پر اس کا عاشق سورج دیشمکھ اور سورج کی دوسری معشوقہ سیما بھی موجود تھی۔

شبھانگی کو جب اس معاشقہ کا پتہ چلا تو اس نے سیما کو سورج سے دور رہنے کی تنبیہ کی اور کہا کہ میرے بوائے فرینڈ کے ساتھ کیوں رہتی ہو۔ اس کو لے کر دونوں میں جھگڑا ہونے لگا۔ اس جھگڑے کو ختم کرنے کے لیے سورج نے دونوں کو امراوتی کے نئے بائی پاس کے قریب بلایا۔

بلائے گئے مقام پر سورج اور شبھانگی کے علاوہ شبھانگی کی سہیلی بھی پہنچی۔ دونوں کے درمیان صلح کی بات چلتی رہی۔ لیکن ناراض سیما نے شبھانگی کے گلے پر سبزی کاٹنے والی تیز چھُری سے حملہ کر دیا۔ چھُری کے حملے سے شبھانگی خون سے شرابور ہو گئی۔ اس کے بعد اس کی سہیلی اور سورج نے اسے امراوتی کے اِرون اسپتال میں داخل کروایا، جہاں ڈاکٹروں نے شبھانگی کو مردہ قرار دے دیا۔ یہ دیکھ کر سورج دیشمکھ وہاں سے بھاگ کھڑا ہوا جبکہ شبھانگی پر حملہ کرنے والی سیما بھی موقع سے فرار ہو گئی۔

راجا پیٹھ کے ڈی سی پی گنیش شندے نے بتایا کہ واقعہ کی جانکاری ملتے ہی فوراً پولیس موقع پر پہنچی اور شبھانگی کی سہیلی سے جانکاری حاصل کی۔ پولیس نے جائے وقوع پر پنچ نامہ کرکے لاش کو قبضے میں لے لیا اور اس معاملے کی جانچ شروع کر دی۔ پولیس قتل کی ملزمہ سیما اور اس کے عاشق سورج کی تلاش کر رہی ہے۔