نئے سال کی تقریبات منانے کی اجازت دینا پڈوچیری کے مفاد میں: نارائن سامی

پڈوچیری: پڈوچیری کے وزیر اعلی وی نارائن سامی نے بدھ کو کہا ہے کہ ریاست میں نئے سال کے موقع پر تقریبات منانے کی اجازت دینے کا فیصلہ ریاستی ڈیزاسٹر منیجمنٹ اتھارٹی (ای ڈی ایم اے) کی میٹنگ کے بعد کیا گیا ہے، جو موجودہ معاشی حالات کے پیش نظر مکمل طور سے ریاست کے مفاد میں ہے۔ لیفٹیننٹ گورنر کرن بیدی کو تین صفحات پر مشتمل جواب میں وزیر اعلی نارائن سامی نے کہا کہ نیا سال منانے کے لئے ملک کی بیشتر ریاستوں میں کوئی پابندی عائد نہیں کی گئی ہے۔

نارائن سامی نے کہا کہ لیفٹیننٹ گورنر گزشتہ نو مہینوں سے راج بھون سے باہر نہیں آئیں ہیں اس لئے انھیں اصل صورتحال کا اندازہ نہیں ہے جبکہ وزیر اعلی سمیت ریاستی حکومت کے کابینہ وزرا، مسلسل کورونا مریضوں سے ملنے کے لئے اسپتالوں، کنٹینمنٹ زونوں اور مختلف علاقوں کا دورہ کر رہے ہیں۔ لیفٹیننٹ گورنر کو حقیقی صورتحال جانے بغیر مشورہ نہیں دینا چاہیے۔

انہوں نے سپریم کورٹ کا حوالہ دیتے ہوئے کہا کہ عدالت نے اس طرح کے تیوہاروں پر پابندی عائد نہیں کی ہے۔ انہوں نے کہا کہ سپریم کورٹ کی ہدایت کے مطابق ریاستوں میں تیوہاروں اور تقریبات کے دوران کورونا کے بارے میں مرکزی حکومت کی طرف سے جاری کردہ رہنما اصولوں پر عمل کیا جائے اور لوگوں کی تعداد طے شدہ معیار کے مطابق ہو۔