الہ آباد: افکو پلانٹ میں گیس کا اخراج، 2 افسران ہلاک، 15 ملازمین کی حالت خراب

الہ آباد: اتر پردیش میں الہ آباد (پریاگ راج) کے پھولپور افکو پلانٹ میں گزشتہ رات امونیا گیس کے اخراج کے سبب دو افسران کی موت ہو گئی، جبکہ گیس کی زد میں آنے والے 15 ملازمین کی طبیعت بگڑ گئی۔ تمام متاثرین کو علاج کے لئے اسپتال میں داخل کرایا گیا ہے۔ امونیا گیس کے سبب جن افسران کی موت واقع ہوئی ہے ان کے نام وی پی سنگھ اور ابھے نندن ہیں۔ آج تک کی رپورٹ کے مطابق یہ حادثہ ممکنہ طور پر یوریا کی پیداوار سے متعلق یونٹ میں نصب پمپ میں خرابی آ جانے کی وجہ سے گیس کا اخراج ہوا۔

موصول ہونے والی اطلاعات منگل کی شب 11 بجے پھولپور افکو کی پی-1 یونٹ میں امونیا گیس کا اخراج شروع ہوا۔ وہاں موجود افسر وی پی سنگھ اخراج روکنے کے لئے پہنچے لیکن وہ بری طرح متاثر ہو گئے۔ اس کے بعد انہیں بچانے کے لئے گئے افسر ابھے نندن بھی گیس کی زد میں آ گئے۔ ان دونوں افسران کو وہاں موجود ملازمین نے باہر نکالا۔

اس دوران گیس کا اخراج ہوتا رہا، امونیا پوری یونٹ میں پھیل گئی اور وہاں موجود 15 ملازمین اس کی زد میں آ گئے۔ گیس کی زد میں آنے والے متعدد ملازمین بے ہوش ہو گئے۔ موقع پر پہنچے ماہرین نے حالات کو قابو میں کیا۔ بتایا جا رہا ہے کہ امونیا کی زد میں آنے والے ملازمین دھرمویر سنگھ، لال جی، ہریش چندر، اجیت کشواہا، راکیش کمار، شیو، کاشی، بلوار، اجے یادو، سی ایس یادو، آر آر وشوکرما وغیرہ کو حالت بگڑنے کے بعد اسپتال میں داخل کرایا گیا ہے۔

موقع پر پہنچے ایس پی گنگاپار دھول جیسوال، سی او رام ساگر، ایس ڈی ایم یوراج سنگھ اور افکو کے یونٹ ہیڈ محمد مسعود سمیت کئی افسران ریسکیو آپریشن میں مصروف ہیں۔