ملک کے مختلف حصوں سے واپس آنے والے سبھی افراد کا کورونا ٹیسٹ کیا جائے گا: صوبائی کمشنر جموں

جموں: صوبائی کمشنر جموں سنجیو ورما نے کہا ہے کہ ملک کے مختلف حصوں سے خصوصی ریل گاڑیوں کے ذریعے واپس لائے جانے والے جموں وکشمیر کے لوگوں کا گھر بھیجنے سے قبل کورونا وائرس ٹیسٹ کیا جا رہا ہے اور انہیں انتظامی قرنطینہ میں بھیجا جا رہا ہے۔ انہوں نے کہا کہ جن کا ٹیسٹ مثبت آتا ہے اُن کا پروٹوکال کے مطابق علاج و معالجہ شروع کیا جاتا ہے اور جن کا ٹیسٹ منفی آرہا ہے انہیں گھر بھیج دیا جا رہا ہے۔

موصوف صوبائی کمشنر نے ادھم پور میں میڈیا کو بتایا کہ 'ہمارے جو لوگ باہر ہیں چاہے وہ جموں کے ہیں یا وادی کے، انہیں مخصوص ٹرینوں کے ذریعے لایا جا رہا ہے، لیکن گھر بھیجنے سے پہلے ان کو یہاں اودھم پور میں الگ الگ مراکز پر ٹیسٹ کیا جائے گا اور پھر ان کی ٹیسٹ رپورٹ آنے تک انہیں انتظامی کورنٹائن میں رکھا جائے گا'۔

انہوں نے کہا کہ انتظامی کورنٹائن کے دوران جن کے ٹیسٹ مثبت آئیں گے ان کا پروٹوکال کے مطابق علاج معالجہ ہوگا اور جن کے ٹیسٹ منفی آئیں گے انہیں اپنے اپنے گھر بھیج دیا جائے گا۔ سنجیو کمار نے مزید کہا کہ ان لوگوں کا باقاعدہ رجسٹریشن کیا جا رہا ہے تاکہ انہیں ٹیسٹ رپورٹ آنے کے بعد کسی دقت کا سامنا نہ کرنا پڑے۔ قابل ذکر ہے کہ جموں وکشمیر میں کورونا وائرس کے مثبت کیسز کی تعداد قریب ایک ہزار تک پہنچ گئی ہے جبکہ یونین ٹریٹری میں اب تک اس وبا سے مرنے والوں کی تعداد 11 ہوگئی ہے۔