گجرات میں کانگریس کے طلوع ہونے کا مقبول گجراتی اخبارات نے استقبال کیا

گجرات کے سبھی بڑے اخبارات نے ریاست میں کانگریس کا سورج طلوع ہونے کی بات کا اعتراف کیا ہے اور نئے جوش میں نظر آ رہی کانگریس پارٹی کا استقبال بھی کیا ہے۔ 18 دسمبر کو گجرات اسمبلی انتخابات کے نتائج آنے کے بعد اور بی جے پی کی لگاتار چھٹی بار جیت حاصل کرنے کے بعد گجراتی اخبارات کا کانگریس کی تعریف کرنا راہل گاندھی بریگیڈ کے لیے یقیناً خوش آئند ہے۔

گجرات کے مقبول عام اخبار ’گجرات سماچار‘ کی شہ سرخی پر نظر ڈالیے تو اس میں بڑے بڑے حروف میں لکھا گیا ہے ’بھاجپانی جیت ما ہار، کانگریس ہاری نے جیتیو‘ یعنی بی جے پی جیت کر بھی ہار گئی اور کانگریس ہار کر جیت گئی۔

دوسرے مقبول عام اخبار ’سندیش‘ نے بھی اپنے پہلے صفحہ پر سرخی لگائی ہے ’بھاجپانو وجیہ کانگریس نو نوسرجن‘ یعنی بی جے پی جیتی، کانگریس نئی شکل میں نمودار ہوئی۔

روزنامہ ’دِویہ بھاسکر‘ نے بھی اپنی خبر میں کانگریس کی ہی تعریف کی ہے۔ اس نے لکھا کہ گزشتہ پچیس سالوں میں بی جے پی نے سب سے کم سیٹیں اس انتخاب میں جیتی ہیں اور کانگریس نے 32 سالوں میں سب سے زیادہ سیٹیں حاصل کی ہیں۔

سورت کے مشہور اخبار ’گجرات متر‘ نے بی جے پی کی انتخابی جیت پر طنزیہ لہجہ اختیار کیا ہے۔ اس نے سرخی لگائی ہے ’’گجراتے جانے مودی نو کان آملی، ناک راکھیو!‘ یعنی گجرات نے مودی کا کان کھینچا، ناک بچائی۔

سبھی بڑے گجراتی اخبارات نے کانگریس کی انتخابی مہم میں تیزی لانے اور پارٹی کارکنان کا حوصلہ بڑھانے کے لیے کانگریس سربراہ راہل گاندھی کی تعریف کی ہے۔ اخباروں نے ان کی اس بات کے لیے تعریف کی ہے کہ انتخابی تشہیر کو نچلی سطح کے ذاتی حملوں پر لے جانے کی بی جے پی کی لگاتار کوشش میں وہ نہیں پھنسے۔

ان اخبارات نے ایک مضبوط اپوزیشن کی شکل میں نمودار ہونے پر کانگریس کا استقبال کیا اور اس بات پر زور ڈالا کہ برسراقتدار بی جے پی پر دباؤ بنانے کے لیے یہ بہت ضروری تھا۔ اس سے انتخابی تشہیر کے دوران بی جے پی کے ذریعہ کیے گئے وعدوں کو پورا کرانے میں مدد ملے گی۔

جب سے انتخابی نتائج میں یہ سامنے آیا ہے کہ بی جے پی کو صرف 99 سیٹیں ملی ہیں، برسراقتدار پارٹی میں اس تعلق سے کوئی خاص جشن کا ماحول نہیں ہے، سینئر کارکنان کے درمیان نہ تو آتش بازی دیکھنے کو مل رہی ہے اور نہ ہی ڈھول نگاڑوں کی آواز سنائی دے رہی ہے۔