شمشان ،قبرستان میں جگہ نہیں سرکار اعداد وشمار چھپا نے میں مصروف:اکھیلیش

سماجوادی پارٹی کے صدر اکھیلیش یادو نے الزام لگایا ہے کہ بی جے پی حکومت کے لوگ اور پالیسی ساز ناکامیوں اور وزیراعلی یوگی آدتیہ ناتھ کے انتظامیہ پر کنٹرول کھو دینےسے اترپردیش میں کورونا بحران خطرناک شکل اختیار کرتا جا رہا ہے۔

انہوں نے کہا کہ ہر روز انفیکشن کے مریضوں کی تعداد میں بے تہاشا اضافہ ہو رہا ہے اور شمشان گھاٹوں اور قبرستانوں میں آخری رسومات ادا کرنے کےلئے جگہ نہیں بچی ہے۔

ڈبل انجن والی حکومتیں جن ریاستوں میں ہیں وہاں کورونا کی دوسری لہر کے قہر نے سبھی جھوٹے دعووں اور بد انتظامی کی پول کھول کر رکھ دی ہے۔ اعدادو شمار چھپانے کےلئے اترپردیش ،گجرات،مدھیہ پردیش،بہار میں ٹیسٹنگ ،ٹریٹمنٹ اور ٹریکنگ سے کھلواڑ نے حالات کو مزید بگاڑ دیا ہے۔

سرکاری لاپرواہی کا عالم یہ ہے کہ اترپردیش میں وزیراعلی کی ہدایت پر جن ڈاکٹروں،افسروں کو ہیلپ لائنوں میں لگایا گیا وہ فون ہی نہیں اٹھاتے ہیں اور جواٹھا لیتے ہیں وہ مدد مانگنے والوں سے بدتمیزی سے پیش آتے ہیں۔ کرگل کے شہید کے باپ اور ریٹائرڈ جج تک اس غیر انسانی برتاؤ کے شکار ہوئے ہیں۔

انہوں نے بتایا کہ پانچ دنوں میں چھ میونسیپل کارپوریشن اہلکار کورونا سے مر چکے ہیں۔ کل لکھنؤ میں 6,598 نئے مریض ملے۔ ان میں 35 زندگی کی جنگ ہار گئے۔ ایک اپریل سے 16 اپریل تک 234 مریضوں کی موت دل دہلانے دینے والا واقعہ ہے۔

انہوں نے کہا کہ گورنر کو اب تو ریاست کی ہر دن بگڑتی صورت حال کا نوٹس لینا چاہئے،یہ آئین کے مطابق ہوگا۔