مورتی اپنے ساتھ لے کر پہنچے اکھلیش یادو، سڑک کے بیچوں بیچ پہنایا ہار، لکھنؤ کے جے پی این آئی سی میں زبردست ہنگامہ

لکھنؤ: جے پرکاش نارائن کے یوم پیدائش کے موقع پر لکھنؤ میں ہنگامہ آرائی جاری ہے۔ اکھلیش یادو جے پی سنٹر میں خراج عقیدت پیش کرنا چاہتے تھے لیکن انتظامیہ نے انہیں اندر داخل ہونے کی اجازت نہیں دی۔ حکومت نے ان کو احاطہ میں جانے سے روکنے کے لیے بڑی تعداد میں پولیس اہلکار تعینات کر دیئے ہیں۔ اس کے بعد اکھلیش یادو گھر سے باہر نکلے۔ ایس پی کارکنان جے پی کے مجسمے کے ساتھ یہاں پہنچے اور اکھلیش نے اسے سڑک کے بیچوں بیچ پھولوں کا ہار پہنایا۔

اس کے بعد اکھلیش یادو نے وہاں موجود ایس پی کارکنوں کو مخاطب کرتے ہوئے کہا، ’’یہ تباہ کن حکومت ہے۔ یہ لوگ جے پی این آئی سی کو فروخت کرنا چاہتے ہیں۔ ہم ہر سال جے پی جینتی منائیں گے۔ یہ حکومت گونگی بہری حکومت ہے۔ یہ حکومت سماجوادیوں کو جے پی جینتی منانے کی اجازت نہیں دے رہی ہے۔ آج رام نومی ہے اور یہ لوگ ہمیں تہوار منانے کی اجازت نہیں دے رہے ہیں۔‘‘

اکھلیش یادو نے کہا، ’’حکومت جے پی این آئی سی کو بیچنا چاہتی ہے۔ ورلڈ کلاس عمارت بیچ کر منافع لینے کی خواہش ہے۔ جو حکومت غریبوں کو بھیڑیوں سے نہیں بچا پا رہی، غریبوں اور کسانوں کو گلدار سے نہیں بچا پا رہی، جو حکومت غریبوں کی مدد کرنے کے قابل نہیں ہے، وہ ہماری صحت کی فکر کیوں کر رہی ہے اور کہہ رہی ہے کہ وہاں بچھو ہیں! ہماری فکر نہ کرو۔ اس حکومت میں بچھو ہیں۔‘‘