اجمیر: آکسیجن کی ضرورت والے کورونا مریضوں کو ہی وارڈ میں داخل ہونے کی اجازت

اجمیر: راجستھان کے اجمیر میں ڈیویژن کے سب سے بڑے جواہر لال نہرو اسپتال میں آج سے صرف آکسیجن کی ضرورت والے مریض ہی کورونا وارڈ میں داخل کیے جائیں گے۔ کورونا متاثرہ مریضوں کی بڑھتی تعداد کے پیش نظر اب صرف انہی مریضوں کو داخل کیا جائے گا جنہیں آکسیجن پر رکھنا ضروری ہوگا۔

اسپتال کے سپرنٹنڈنٹ ڈاکٹر انل جین نے بتایا کہ ضلع میں ہر روز شدید کورونا مریضوں کی تعداد میں اضافہ ہو رہا ہے۔ اسپتال میں آکسجین بیڈ کی تعداد 553 سے بڑھاکر 623 کی جا رہی ہے تاکہ نازک حالت والے مریضوں کے علاج میں پریشانی نہ ہو۔

انہوں نے بتایا کہ میڈیکل ہیڈکوارٹرکی ہدایت پر اب جن مریضوں کو آکسیجن کی ضرورت نہیں ہوگی انہیں ہوم قرنطینہ کرکے ہی وہیں علاج مہیا کرایا جائے گا اور جس علاقے میں وہ رہتے ہیں وہاں کے میڈیکل انچارج ان کی نگرانی کریں گے۔ انہوں نے بتایا کہ اسپتال میں فی الحال 304 مریض داخل ہیں۔

واضح رہے کہ بڑھتے انفیکشن کے پیش نظر ضلع کلیکٹر پرکاش راج پروہت نےاسپتال کے علاوہ کائڑ میں آیورویدک اسپتال کے کووڈ کیئر سینٹر گھوگھرا میں واقع آئی آئی ٹی میں بھی اضافی بستروں کا انتظام کرایا ہے۔