فضائی آلودگی: دہلی میں گزشتہ 24 گھنٹوں میں 2200 لوگوں کا چالان، 20 ہزار روپے تک کا جرمانہ

نئی دہلی: دہلی میں آلودگی سے نمٹنے کے لیے پولیس بھی متحرک ہو گئی ہے۔ دہلی پولیس نے اتوار کو بڑھتی ہوئی آلودگی اور ہوا کے بگڑتے ہوئے معیار کے پیش نظر 2200 لوگوں کے چالان جاری کیے ہیں۔ موٹر وہیکل ایکٹ کے تحت دہلی میں پرانی ڈیزل-پٹرول گاڑیوں اور غیر ضروری سامان لے جانے والے ٹرک چلانے پر 20000 روپے کا چالان ہے۔

جی آر اے پی فورتھ کے تحت دیگر ریاستوں سے صرف سی این جی، الیکٹرک اور بی ایس سکس گاڑیوں کو دہلی میں داخل ہونے کی اجازت دی گئی ہے۔ دہلی ٹریفک پولیس کے مطابق اتوار کو قومی دارالحکومت میں 6757 گاڑیوں کو روکا گیا اور 2216 گاڑیوں کے چالان جاری کیے گئے۔ ان میں سے 1024 گاڑیوں کے چالان آلودگی کنٹرول (پی یو سی) نہ ہونے پر جاری کیے گئے، بی ایس-تھرڈ گاڑیوں کے 217 چالان اور بی ایس-فورتھ گاڑیوں کے 975 چالان جاری کیے گئے۔

دہلی پولیس کے مطابق صرف ضروری خدمات سے وابستہ لوگوں کو مستثنیٰ کیا گیا ہے۔ کمیشن فار ایئر کوالٹی مینجمنٹ (سی اے کیو ایم) کے حکم کے مطابق، تمام درمیانے اور بھاری سامان کی گاڑیوں پر بھی پابندی عائد کر دی گئی ہے جو ضروری خدمات میں شامل نہیں ہیں۔

اکتوبر میں دہلی ٹریفک پولیس نے بغیر پی یو سی سی کے 17989 گاڑیوں کے چالان جاری کیے تھے۔ جب کہ بغیر ڈھکے، ریت یا مٹی لے جانے والے 58 ٹرکوں کو 31 چالان جاری کئے گئے۔ دہلی-این سی آر میں آلودگی بدستور تباہی مچا رہی ہے۔ ایسے میں دہلی حکومت نے اس پر قابو پانے کے لیے کئی بڑے قدم اٹھائے ہیں۔ دارالحکومت میں 13 اکتوبر سے طاق کو لاگو کر دیا گیا ہے۔ دوسری جانب پولیس نے بھی سختی بڑھا دی ہے۔ خبر رساں ایجنسی کے مطابق ایک سینئر پولیس افسر نے بتایا کہ دہلی کی 20 بڑی سرحدیں ہیں جن میں راجوکری، کاپاشیرا، بدر پور، کالندی کنج، ٹکری، اوچندی، بھوپورہ، اپسرا، چِلا، سنگھو شامل ہیں۔ تمام سرحدوں پر پولیس فورس تعینات کر دی گئی ہے۔

اہلکار نے کہا کہ ہم جی آر اے پی فورتھ کے تحت دی گئی ہدایات پر عملدرآمد کر رہے ہیں اور غیر شیڈول گاڑیوں کو واپس بھیجا جا رہا ہے۔ تاہم ضروری سامان لے جانے والی گاڑیوں کو اجازت دی جا رہی ہے۔

انہوں نے بتایا کہ شہر میں 13 ایسے مقامات ہیں جہاں حد سے زیادہ آلودگی ہے اس لیے ہم نے اپنے ملازمین کو وہاں تعینات کیا ہے۔ دہلی میونسپل کارپوریشن (ایم سی ڈی) کے ساتھ تجاوزات اور غیر مجاز پارکنگ کے خلاف مشترکہ مہم چلائی جا رہی ہے۔ ہم نے اپنے عملے کو رش والے علاقوں میں مصروف اوقات میں تعینات کیا ہے تاکہ اس بات کو یقینی بنایا جا سکے کہ ٹریفک کی نقل و حرکت متاثر نہ ہو۔