ایمس سائبر حملہ: نامعلوم ہیکروں کے خلاف ایف آئی آر درج

نئی دہلی: حکومت نے آج کہا کہ راجدھانی میں واقع آل انڈیا انسٹی ٹیوٹ آف میڈیکل سائنسز (ایمس) کے سرورز پر سائبر حملے کے سلسلے میں نامعلوم افراد کے خلاف ایف آئی آر درج کی گئی ہے۔ وزیر مملکت برائے داخلہ اجے مشرا ٹینی نے لوک سبھا میں وقفہ سوال کے دوران کانگریس لیڈر ادھیر رنجن چودھری کے سوال کے جواب میں یہ معلومات دی۔

اجے مشرا ٹینی نے کہا کہ ایمس سرور کا آپریشن اور سیکورٹی ایمس کے ماہرین کرتے ہیں۔ 23 نومبر کو ہونے والے اس سائبر حملے کے بعد سرور متاثر ہوا تھا اور اب سرور معمول کے مطابق کام کر رہا ہے۔ اس معاملے میں دہلی پولیس کی اسپیشل برانچ نے نامعلوم افراد کے خلاف ایف آئی آر درج کی ہے۔ ادھیر چودھری نے اس کے پیچھے چین اور ہانگ کانگ کے ہیکروں کے رول کے بارے میں پوچھا تھا، جس پر اجے مشرا نے کوئی جواب نہیں دیا اور کہا کہ سیکورٹی ایجنسیاں اس کی جانچ کر رہی ہیں۔

ایک رپورٹ کے مطابق دہلی پولیس کے انٹیلی جنس اور اسٹریٹجک آپریشن یونٹ (انٹیلی جنس فیوژن اور اسٹریٹجک آپریشنز یونٹ) نے سینٹرل بیورو آف انویسٹی گیشن (سی بی آئی) کو خط لکھ کر ایمس کے سرور پر سائبر حملے کے لئے چین اور ہانگ کانگ کے کچھ ای میل آئی ڈی کے آئی پی ایڈریس کے بارے میں انٹرپول سے معلومات حاصل کرنے کی درخواست کی ہے۔

سائبر اٹیک کی وجہ سے ایمس کا سرور ڈاؤن ہو گیا تھا اور اسے معمول پر لانے میں کافی وقت لگا۔ ایک اور سوال کے جواب میں اجے مشرا نے کہا کہ ملک میں سائبر سیکورٹی سے متعلق ٹریننگ کے لیے 27 ہزار سے زیادہ افسران نے رجسٹریشن کرایا ہے جبکہ 7 ہزار سے زیادہ لوگوں کو تربیت کے بعد سرٹیفکیٹ دیا گیا ہے۔