پہلوانوں کو دہلی پولیس پر بھروسہ نہیں، برج بھوشن سنگھ کو جیل میں ڈالنے اور سبھی عہدوں سے ہٹانے کا مطالبہ

انڈین ریسلنگ فیڈریشن کے سربراہ اور بی جے پی رکن پارلیمنٹ برج بھوشن شرن سنگھ کے خلاف خاتون پہلوانوں کے الزامات کا معاملہ سپریم کورٹ جانے پر دہلی پولیس اب ان کے خلاف ایف آئی آر درج کرنے کے لیے راضی ہو گئی ہے۔ لیکن پہلوانوں کو دہلی پولیس پر بھروسہ نہیں رہ گیا کیونکہ اب تک انھوں نے جو کارروائی کی وہ انتہائی مایوس کن رہی ہے۔ یہی وجہ ہے کہ پہلوانوں نے برج بھوشن سنگھ کو جیل میں ڈالنے اور سبھی عہدوں سے انھیں ہٹانے کا مطالبہ کیا ہے۔

سپریم کورٹ میں ہوئی سماعت کے بعد پہلوان ونیش پھوگاٹ نے میڈیا سے خطاب کرتے ہوئے کہا کہ آج عدالت کا فیصلہ آیا ہے، لیکن دہلی پولیس پر ہمیں بھروسہ نہیں ہے۔ ہم 6 دنوں سے بیٹھے ہیں۔ دہلی پولیس کی کارروائی پر ہی ہمارا اگلا قدم ہوگا۔ ہمارا مطالبہ ہے کہ ریسلنگ فیڈریشن کے چیف برج بھوشن شرن سنگھ کو جیل میں ڈالا جائے۔ میری وزیر اعظم سے اخلاقی بنیاد پر اپیل ہے کہ برج بھوشن کو ہر ایک عہدہ سے ہٹایا جائے۔ جب تک وہ اس عہدہ پر رہیں گے، وہ اس کا غلط استعمال کریں گے اور جانچ کو متاثر کریں گے۔ ساتھ ہی پھوگاٹ نے کہا کہ سپریم کورٹ پر ہمیں پورا بھروسہ ہے۔

اس سے قبل آج سپریم کورٹ نے پہلوانوں کے معاملے پر سماعت کی۔ اس دوران دہلی پولیس نے سپریم کورٹ کو مطلع کیا کہ وہ ریسلنگ فیڈریشن چیف برج بھوشن شرن سنگھ کے خلاف خاتون پہلوانوں کے جنسی استحصال کے الزام میں ایف آئی آر درج کرے گی۔ سالیسٹر جنرل تشار مہتا نے چیف جسٹس ڈی وائی چندرچوڑ کی صدارت والی بنچ کے سامنے کہا کہ ہم نے ایف آئی آر درج کرنے کا فیصلہ کیا ہے، ہم اسے آج ہی درج کریں گے۔ اس پر چیف جسٹس نے مہتا سے کہا کہ مسٹر سالیسٹر ہم آپ کا بیان درج کریں گے کہ ایف آئی آر درج کی جا رہی ہے۔ دوسرا، ہم کہیں گے کہ نابالغ شکایت دہندہ کو سیکورٹی مہیا کرائی جائے۔ اسے نمٹانے کی جگہ، ہم اسے ایک ہفتہ کے بعد لیں گے۔ اس دوران کپل سبل نے ایک نابالغ شکایت دہندہ لڑکی کی سیکورٹی کو لے کر سیل بند لفافے میں بنچ کے سامنے ایک حلف نامہ پیش کیا۔ اس پر بنچ نے دہلی پولیس کو خطرے کے اندیشہ کا جائزہ لینے اور نابالغ لڑکی کو سیکورٹی فراہم کرنے کی ہدایت دی۔