انکاؤنٹر کے بعد وکاس دوبے کی ماں بولی 'اس سے کوئی رشتہ نہیں، کانپور نہیں جاؤں گی'

کانپور کا بدنام زمانہ گینگسٹر اور 8 پولس اہلکاروں کے قتل کا ملزم وکاس دوبے جمعہ کی صبح ایک پولس انکاؤنٹر میں ہلاک ہو گیا۔ فی الحال اس کی لاش کو یو پی واقع کانپور کے لالہ لاجپت رائے اسپتال میں رکھا گیا۔ اسی اسپتال میں زخمی پولس اہلکاروں کو بھی داخل کرایا گیا ہے۔ اسپتال کے ڈاکٹر آر بی کمل کا کہنا ہے کہ "وکاس دوبے جب یہاں پہنچا تو وہ مر چکا تھا اور اس کو 4 گولیاں لگی تھیں جن میں سے تین گولیاں اس کے سینے میں لگی تھیں اور ایک ہاتھ میں۔"

وکاس دوبے کی ہلاکت کی خبر جب اس کی ماں سرلا دیوی کو ملی تو انھوں نے اس تعلق سے میڈیا میں کچھ بھی کہنے سے منع کر دیا اور خود کو اپنے گھر میں بند کر لیا۔ ہندی نیوز پورٹل 'اے بی پی' پر شائع ایک رپورٹ کے مطابق سرلا دیوی کی طبیعت بھی کچھ ناساز ہو گئی ہے جس کی وجہ سے انھوں نے کوئی بھی بیان دینے سے منع کر دیا۔ حالانکہ انھوں نے پولس سے کہا کہ بیٹے وکاس دوبے سے ان کا کچھ لینا دینا نہیں ہے۔

بتایا جاتا ہے کہ سرلا دیوی نے پولس سے صاف لفظوں میں کہہ دیا ہے کہ وہ کانپور نہیں جانا چاہتی اور لکھنؤ میں ہی رہنا چاہتی ہے۔ اس وقت سرلا دوبے اپنے دوسرے بیٹے دیپ پرکاش کی بیوی کے ساتھ لکھنؤ واقع کرشنا نگر کے اندرلوک کالونی میں رہتی ہیں۔ انکاؤنٹر میں وکاس دوبے کی موت کے بعد انھوں نے کہا کہ وکاس دوبے سے ان کا کوئی رشتہ نہیں ہے، اس لیے وہ کانپور نہیں جانا چاہتی۔ قابل ذکر ہے کہ ایک دن قبل جب وکاس دوبے مدھیہ پردیش میں گرفتار ہوا تھا تب سرلا دیوی نے کہا تھا کہ حکومت جو مناسب سمجھے اس کے ساتھ کرے۔