دہلی میں کورونا متاثرین کی تعداد میں کمی، کیجریوال نے امداد لینے کے لئے پورٹل شروع کیا

دہلی میں کورونا متاثرین کی تعداد کل کچھ کم رہی جس کی وجہ سےمتاثرہونےکی شرح فیصد میں واضح کمی ہوئی ہے۔گزشتہ دو ہفتوں میں پہلی مرتبہ کورونا پازیٹو ہونے کی شرح فیصد 30 فیصد سےکم رہی ۔کل یعنی اتوار کو کورونا متاثرین کی شرح فیصد 28.33% رہی جبکہ وباسےمرنےوالے افراد کی تعداد 407 رہی۔

واضح رہے کل لگاتار دوسرا دن تھا جب اموات کی تعداد چار سو سےزیادہ رہی۔ گزشتہ 24 گھنٹوں میں راجدھانی دہلی میں نئے کورونا مریضوں کی تعداد 20394رہی اور دہلی میں کل 72 ہزار کورونا کےٹیسٹ ہوئے۔ ہفتہ کے روز کورونا کے نئے مریضوں کی تعداد 25ہزار سے زیادہ تھی اور اس دن 412 افراد کی کورونا سے موت ہوئی تھی۔

دہلی میں کورونا کے نئے مریضوں کی تعداد میں کمی سےدہلی میں کچھ راحت ہے ۔ دہلی میں جوآکسیجن کی قلت ہےاس کو لےکر بھی عدالت کا رویہ سخت ہے اور اس نےمرکز کو ہدایت جاری کی ہے کہ وہ اس قلت کو دور کرے۔دہلی میں کورونا کے مریض اسپتال میں بستر کی تلاش اور آکسیجن کی دستیابی کے لئے بہت پریشان ہیں ۔

دہلی حکومت نےکورونا کےخلاف لڑائی میں مدد مانگنےکےلئے پورٹل شروع کیا ہے۔ اس پورٹل کے ذریعہ ہندوستان اور بیرون ممالک میں رہنےوالےلوگ کورونا کےخلاف اس مشکل لڑائی میں مدد کر سکتےہیں۔ عام آدمی پارٹی کا یہ طریقہ نیا نہیں ہے ۔ یہ پارٹی جب اقتدار میں آئی تھی تو اس نے ایسےہی پارٹی کےلئے فنڈ مانگا تھا۔ ادھر مرکز میں بھی وزیر اعظم نریندر مودی نےوزیر اعظم کیئر فنڈ شروع کیا ہوا ہے جس کو لےکر حزب اختلاف سوال اٹھاتی رہتی ہے۔