26 جنوری: ٹرمپ کے انکار کے بعد افریقی صدر ’راماپوسا‘ ہوں گے مہمانِ خصوصی

یوم جمہوریہ یعنی 26 جنوری کے موقع پر مودی حکومت نے امریکی صدر ڈونالڈ ٹرمپ کو مہمانِ خصوصی بنانے کا فیصلہ کیا تھا لیکن انھوں نے یہ دعوت نامہ ٹھکرا دیا۔ اس واقعہ کے بعد سے مودی حکومت کی کافی بدنامی ہوئی اور لوگوں اس بات کا بھی انتظار کرنے لگے کہ اب وزیر اعظم کسے مدعو کریں گے۔ خبر رساں ایجنسی ’اے این آئی‘ نے اس تعلق سے خبر دی ہے کہ جنوبی افریقہ کے صدر سائرل راماپوسا امریکی صدر کے متبادل ہو سکتے ہیں۔ میڈیا ذرائع کا کہنا ہے کہ راماپوسا نے ہندوستان کا دعوت نامہ قبول کر لیا ہے۔

خبروں کے مطابق ٹرمپ کے انکار کے بعد سبکی کا سامنا کر رہی مودی حکومت نے جلد ہی کسی دیگر متبادل پر غور کرنا شروع کر دیا اور کافی غور و خوض کے بعد افریقی صدر راماپوسا کے نام پر بات بنی۔ راماپوسا اسی سال افریقی نیشنل کانگریس (اے این سی) کا نیا صدر منتخب کیا گیا تھا۔ فروری میں انھوں نے جنوبی افریقہ کے صدر عہدہ کا حلف لیا۔ یہاں قابل ذکر ہے کہ جنوبی افریقہ ’برکس‘ کا ایک اہم رکن ہے اور وزیر اعظم نریندر مودی نے اسی سال جون میں برکس سمٹ کے دوران سائرل راماپوسا سے ملاقات بھی کی تھی۔

وزیر اعظم نریندر مودی نے جنوبی افریقہ کے صدر کو مدعو کر کے امریکی صدر ڈونالڈ ٹرمپ کا متبادل ضرور تلاش کر لیا ہے لیکن اس پورے معاملے کو ’ڈپلومیٹک ناسمجھی‘ تصور کیا جا رہا ہے۔ ٹرمپ کے ذریعہ مہمانِ خصوصی بننے سے انکار کے بعد کانگریس نے کہا تھا کہ ملک کو اس شرمندگی سے بچایا جا سکتا تھا لیکن مودی حکومت نے ناسمجھی کا مظاہرہ کیا۔ کانگریس لیڈر آنند شرما نے میڈیا سے کہا تھا کہ ’’اس بات کو یاد کرنا اہم ہے کہ حکومت ہند نے جب بھی اپنے وزیر اعظم کے ذریعہ کسی بیرون ملکی حکمراں کو یوم جمہوریہ کے موقع پر مہمانِ خصوصی کے طور پر مدعو کیا ہے تو اس دعوت نامہ کو ٹھکرایا نہیں گیا، اور حکومت تبھی دعوت نامہ بھیجتی ہے جب یہ یقینی رہتا ہے کہ اسے قبول کر لیا جائے گا۔ ڈپلومیٹک معاملے اسی طرح سے کام کرتے ہیں۔‘‘