اتراکھنڈ میں جوشی مٹھ کے بعد کرن پریاگ میں بھی مکانات میں دراڑیں پڑنے سے دہشت، انتظامیہ کی ٹیم نے متاثرہ علاقوں کا کیا دورہ

دہرادون: اتراکھنڈ کے چمولی ضلع کے جوشی مٹھ میں جاری زمین دھنسنے کے بحران کے درمیان، کرن پریاگ میونسپلٹی میں واقع تقریباً 70 مکانات میں بھی دراڑیں پڑ گئی ہیں۔ یہ دراڑیں بھی بہت گہری ہیں۔ جوشی مٹھ کے حالات کو دیکھ کر کئی خاندانوں نے کرن پریاگ میں بھی اپنا گھر بار چھوڑ دیا ہے اور حکومت سے مدد کی اپیل کی ہے۔

چمولی ضلع کی کرن پریاگ میونسپلٹی کے بہوگنا نگر کے 50 گھروں میں بھی دراڑیں پڑی ہیں اور یہاں مختلف مقامات پر زمین کھسکنے کے واقعات بھی پیش آئے ہیں۔ مقامی میونسپلٹی نے وزیر اعلیٰ پشکر سنگھ دھامی کی حکومت سے مدد کی اپیل کی ہے، جبکہ انتظامیہ کی ٹیم نے بھی متاثرہ علاقوں کا دورہ کیا ہے۔

بہوگنا نگر کے کئی خاندان ایسے ہیں جنہوں نے اپنا گھر بار چھوڑ کر اپنے رشتہ داروں کے پاس پناہ لی ہے۔ کرن پریاگ اپر بازار وارڈ کے 30 خاندان بھی تباہی کے خطرے سے دوچار ہیں۔ متاثرین طویل عرصے سے ریاستی حکومت سے مدد کی اپیل کر رہے ہیں۔ لیکن بہوگنا نگر اور اپر بازار وارڈ کے متاثرین تک ریاستی حکومت کی مدد نہیں پہنچی ہے۔ ایسے میں ریاستی حکومت کے خلاف لوگوں میں غصہ ہے۔

تحصیلدار سریندر دیو نے بتایا کہ انتظامیہ کی ٹیم نے متاثرہ علاقہ کا پہلے بھی معائنہ کیا تھا اور 27 عمارتوں کی نشاندہی کی تھی۔ اس کے ساتھ جیولوجیکل سروے اور بڑے تدارک کے منصوبے کی سفارش کی گئی۔ آئی آئی ٹی روڑکی کی ٹیم نے یہاں دو بار سروے کیا ہے، اس کی رپورٹ کا انتظار ہے۔ تحصیلدار کا کہنا ہے کہ یہاں غیر محفوظ عمارتوں کی نشاندہی کرکے انہیں خالی کرایا جائے گا۔ جانچ رپورٹ ڈی ایم کو بھیجی جائے گی اور اس کے مطابق مزید کارروائی کی جائے گی۔

دوسری طرف، جوشی مٹھ میں متاثرہ لوگوں کی مدد کے لیے، ہر خاندان کو 1.50 لاکھ روپے کی عبوری امداد فوری طور پر آفات امدادی فنڈ سے دی جائے گی۔ اس میں سے 50000 روپے گھر کی تبدیلی کے لیے اور ایک لاکھ روپے پیشگی فراہم کیے جا رہے ہیں۔ ان کو بعد میں ایڈجسٹ کیا جائے گا۔ سکریٹری وزیر اعلیٰ آر میناکشی سندرم نے اس کا اعلان کیا ہے۔ اس سلسلے میں اتراکھنڈ حکومت جلد ہی 45 کروڑ روپے واگزار کرنے جا رہی ہے۔

جوشی مٹھ میں زمین دھنسنے سے متاثر ہونے والے مقامی لوگوں کو مارکیٹ ریٹ پر معاوضہ دیا جائے گا اور متعلقہ افراد کی تجاویز اور عوامی مفاد میں مارکیٹ ریٹ کا فیصلہ کیا جائے گا۔ اس کے علاوہ جو لوگ کرائے کے مکان میں جانا چاہتے ہیں، انہیں 6 ماہ کے لیے 4000 روپے ماہانہ کی امداد فراہم کی جائے گی۔