مودی حکومت کا عبوری بجٹ کٹہرے میں، وکیل ایم ایل شرما نے کیا پی آئی ایل داخل

وزیر مالیات پیوش گویل نے عبوری بجٹ میں جس طرح سے کھل کر بڑے بڑے اعلانات کیے، اس سے ایسا محسوس ہی نہیں ہوا کہ وہ عبوری بجٹ پیش کر رہے ہیں۔ لبھاؤنے منصوبے والے اس بجٹ نے نہ صرف پارلیمانی روایات کو توڑا بلکہ آئینی ضابطوں کا بھی لحاظ نہیں کیا۔ یہی سبب ہے کہ وکیل ایم ایل شرما نے اس بجٹ کو کٹہرے میں کھڑا کر دیا ہے۔ انھوں نے بجٹ 2019 کے خلاف پی آئی ایل یعنی مفاد عامہ عرضی داخل کرتے ہوئے اسے منسوخ کرنے کی گزارش کی ہے۔

وکیل ایم ایل شرما نے اپنی مفاد عامہ عرضی میں دعویٰ کیا ہے کہ حکومت نے جس طرح کے اعلانات عبوری بجٹ میں کیے ہیں وہ صرف مکمل بجٹ میں ہی کیے جا سکتے ہیں۔ ان کا کہنا ہے کہ انتخابی سال کے دوران صرف ووٹ آن اکاؤنٹ کی سہولت آئین میں ہے جسے عبوری بجٹ کی شکل میں پیش کیا جاتا ہے۔ اس کے ذریعہ حکومت طے شدہ وقت کے لیے صرف خرچ کی اجازت حاصل کر سکتی ہے۔ عرضی میں ایم ایل شرما نے وضاحت پیش کرتے ہوئے کہا کہ انتخابی سال میں کچھ مدت کے لیے سرکاری خرچ کو منظور دینے کی روایت ہی رہی ہے اور بعد میں منتخب حکومت مکمل بجٹ پیش کرتی ہے۔

ایم ایل شرما نے عبوری بجٹ میں مودی حکومت کے ذریعہ کیے گئے اعلانات کو آئین کے ساتھ دھوکہ قرار دیا اور کہا کہ اس بجٹ پر صدر جمہوریہ کے دستخط لیے جانا ان کے ساتھ بھی دھوکہ ہے۔ ساتھ ہی عرضی دہندہ کا یہ بھی کہنا ہے کہ لوک سبھا انتخابات کے پیش نظر محض سیاسی فائدہ حاصل کرنے کے مقصد سے مرکزی حکومت نے بجٹ میں حد کو پار کرتے ہوئے بڑے اعلانات کیے۔