اشتہارات میں گمراہ کن دعوں پر اب مشتہر بھی ہوں گے ذمہ دار

الہ آباد: کنفیڈریشن آف آل انڈیا ٹریڈرس (کیٹ) نے صدر جمہوریہ کے 'صارف تحفظاتی بل' پر دستخط کر کے قانونی جامہ پہنانے کا استقبال کرتے ہوئے کہا کہ اس سے اب گمراہ کن اشتہارات کو مشتہر کرنے کے لئے سلیبریٹیز پر بھی شکنجہ کسا جاسکے گا۔

کیٹ کے ریاستی صدر مہندر گوئل نے ہفتہ کو یہاں بتایا کہ پورے ملک میں ٹی وی پر چلائے جانے والے اشتہارات میں گمراہ کن دعوے کرنے والی ہستیوں کو بھی قانونی دائرے میں لانے کا مطالبہ کیا تھا۔ صارف تحفظاتی بل پر صدر جمہوریہ کے دستخط نے اسے قانونی مضبوطی فراہم کی ہے۔

انہوں نے کہا کہ اب کسی بھی کمپنی کے برانڈ امبیسڈر اور اداکاروں کو اب اشتہار میں کام کرنے سے قبل اس میں کیے جانے والے وعدوں و دعوؤں کی حقیقت کے بارے میں جانکاری حاصل کرنی ہوگی۔ اب کسی پروڈکٹ کا گمراہ کن اشتہار کرنے والی ہستیاں یہ کہہ کر نہیں بچ سکیں گی کہ انہیں اس کی کوالٹی کی جانکاری نہیں تھی۔ اب جان بوجھ کر صارفین کو کو گمراہ کرنے کا خاطی مان کر ان کو بھی قانونی شکنجہ میں کسا جائے گا۔

گوئل نے بتایا کہ میگی پر پابندی کے وقت کیٹ اس کا اشتہار کرنے والی فلموں ہستیوں پر کاروائی کا لگاتار مطالبہ کرتا رہا کیونکہ ان ہستیوں کی باتوں سے متاثر ہوکر ہی عوام اس کا استعمال کر رہے تھے۔ایسے میں یہ ضروری تھا کہ کچھ پیسوں کو لے کر ٹی وی پر جھوٹ بولنے والوں پر بھی کارروائی کی جائے جس سے عوام گمراہ کن اشتہارات کے ذریعہ گھٹیا کوالٹی یا مہنگے سامان نہ خریدیں۔

انہوں نے کہا کہ صارف تحفظاتی بل کے بعد ایسے گمراہ کن اشتہارات کے بعد خریدے گئے پروڈکٹس پر نقصان ہونے کی صورت میں صارف اس پروڈکٹ کا اشتہار کرنے والی ہستیوں کو بھی ملزم بنا سکتا ہے۔اب ضروری ہوگیا ہے کہ کسی بھی پروڈکٹ کے اشتہار کا حصہ بننے سے پہلے لوگ اس کی کوالٹی کے بارے میں جانکاری ضرور حاصل کرلیں۔