آدتیہ ٹھاکرے نے ٹی ڈی پی اور جنتا دل یو کو دیا ’خاص مشورہ‘، بی جے پی پر عائد کیا سنگین الزام

ایک طرف این ڈی اے حکومت سازی کی تیاریوں میں مصروف ہے، دوسری طرف بی جے پی مخالف پارٹیاں انڈیا بلاک کو مضبوط کرنے میں لگی ہوئی ہیں۔ کچھ لیڈران جنتا دل یو اور ٹی ڈی پی سے گزارش کر رہے ہیں کہ وہ این ڈی اے چھوڑ کر انڈیا بلاک میں شامل ہو جائیں اور ایک ایسی حکومت تشکیل دیں جو عوام کے حق میں کام کرے۔ شیوسینا (یو بی ٹی) لیڈر آدتیہ ٹھاکرے نے بھی اس تعلق سے اپنا نظریہ جنتا دل یو اور ٹی ڈی پی کے سامنے رکھا ہے۔

دراصل آدتیہ ٹھاکرے نے جمعہ کے روز سوشل میڈیا پر ایک پوسٹ کیا ہے جس میں لکھا ہے کہ مرکز میں این ڈی اے کی اگلی حکومت بنانے کے لیے ٹی ڈی پی اور جنتا دل یو کو لوک سبھا اسپیکر عہدہ حاصل کرنے پر زور دینا چاہیے۔ ’ایکس‘ پر ٹھاکرے نے دعویٰ کیا ہے کہ جس وقت بی جے پی حکومت بنائے گی، وہ اپنے ساتھیوں کی پارٹیوں کو توڑنے کی کوشش کرے گی۔ انھوں نے مزید کہا کہ این ڈی اے کے نئے ساتھیوں سے پرخلوص گزارش ہے کہ وہ لوک سبھا اسپیکر کا عہدہ طلب کریں۔

اس درمیان آدتیہ ٹھاکرے نے بغیر نام لیے یہ بھی اشارہ دیا ہے کہ شیوسینا اور این سی پی کی طرح پھوٹ پڑ سکتی ہے۔ انھوں نے ’ایکس‘ پر ٹی ڈی پی اور جنتا دل یو کے ہینڈل کو ٹیگ کرتے ہوئے کہا کہ بی جے پی کے کارناموں کا تجربہ کرنے کے بعد، جیسے ہی وہ آپ کے ساتھ حکومت بنائیں گے، وہ وعدے توڑ دیں گے اور آپ کی پارٹیوں کو بھی توڑنے کی کوشش کریں گے۔ آپ نے پہلے بھی اس کا تجربہ کیا ہوگا۔