آدتیہ ٹھاکرے کو ان کے دادا کی وجہ سے نااہلی کے دائرے سے باہر رکھا: شندے دھڑا

ممبئی: شیو سینا کے ایکناتھ شندے کی قیادت والے دھڑے نے پیر کے روز مہاراشٹر اسمبلی میں اعتماد کا ووٹ حاصل کر لیا۔ شندے دھڑے نے اس کے بعد مہاراشٹر اسمبلی کے نومنتخب اسپیکر راہل نارویکر کو ایک درخواست پیش کرتے ہوئے ادھو ٹھاکرے خیمہ کے 16 ارکان اسمبلی کو وہپ کی خلاف ورزی کرنے پر نااہل قرار دینے کا مطالبہ کیا گیا ہے۔ تاہم اس فہرست میں سابق وزیر اعلیٰ ادھو ٹھاکرے کے بیٹے آدتیہ ٹھاکرے کا نام شامل نہیں ہے۔

نئے چیف وہپ بھرت گوگاوالے نے میڈیا کو بتایا کہ بالا صاحب ٹھاکرے کے وقار کو مد نظر رکھتے ہوئے آدتیہ ٹھاکرے کو نااہل قرار دینے کی درخواست نہیں کی گئی ہے۔ دو ہفتے قبل آدتیہ ٹھاکرے کے والد ادھو ٹھاکرے ریاست کے وزیر اعلیٰ اور شیو سینا کے سربراہ تھے اور انہوں نے ایکناتھ شندے اور دیگر باغی ارکان اسمبلی کو نااہل قرار دینے کی درخواست کی تھی۔ تاہم، اتوار کے روز منتخب ہونے والے اسپیکر راہل نارویکر نے نصف شب کو شیو سینا کے نئے چیف وہپ کی تقرری کو منظوری فراہم کر دی۔

نئے وہپ کی تقرری کو ادھو ٹھاکرے دھڑے نے سپریم کورٹ میں چیلنج کیا ہے۔ عرضی میں کہا گیا ہے کہ اسپیکر شندے دھڑے کی سفارش پر نئے چیف وہپ کو تسلیم نہیں کر سکتے، کیونکہ عدالت کو شندے اور دیگر باغی ارکان اسمبلی کو نااہل قرار دینے کی عرضی پر فیصلہ لینا ہے۔

راہل نارویکر نے ایکناتھ شندے کو بھی اسمبلی میں دوبارہ شیو سینا کے قائد مقننہ کے طور پر بحال کر دیا۔ دو ہفتہ قبل جب ایکناتھ شندے نے ادھو ٹھاکرے حکومت کے خلاف بغاوت کی تھی، تو انہیں اسمبلی میں شیو سینا کے قائد مقننہ کے عہدے سے ہٹٓ دیا گیا تھا۔

ایکناتھ شندے نے شیو سینا کے بیشتر ارکان اسمبلی کو اپنے ساتھ ملا کر ادھو ٹھاکرے حکومت کو گرا دیا تھا۔ اس کے بعد جمعہ کے روز انہوں نے بی جے پی کے ساتھ مل کر مہاراشٹر میں نئی حکومت تشکیل دی۔ گورنر نے ادھو ٹھاکرے سے اکثریت ثابت کرنے کو کہا، اس فیصلے کو سپریم کورٹ میں چیلنج کیا گیا تاہم سپریم کورٹ نے فلور ٹیسٹ پر روک لگانے سے انکار کر دیا۔ اس کے فوری بعد ادھو ٹھاکرے عہدے سے مستعفی ہو گئے۔