کانگریس کی بھارت جوڑو یاترا کے دوران حادثہ، 4 کارکنان کو لگا کرنٹ، راہل گاندھی نے اسپتال پہنچ کر معلوم کی خیریت

کرناٹک کے بیلاری میں کانگریس کی 'بھارت جوڑو یاترا' کے دوران ایک حادثہ پیش آیا۔ پد یاترا میں شامل چار کارکن بجلی کے کرنٹ سے جھلس گئے۔ تمام کارکنوں کو اسپتال میں داخل کرایا گیا ہے۔ پد یاترا اتوار کی صبح بیلاری سے شروع ہوئی تھی اور اس کے بعد پیدل مارچ موکہ نامی مقام پر تک پہنچی۔ پد یاترا میں شامل کچھ کارکنان نے پارٹی کا جھنڈا اور لوہے کی سلاخیں اٹھا رکھی تھیں۔ جیسے ہی لوہے کی سلاخ بجلی کے تار سے ٹکرائی، انہیں کرنٹ کا جھٹکا لگ گیا۔

کانگریس کے ترجمان رندیپ سرجے والا کے مطابق موقع پر موجود ایمبولینس کے ڈاکٹروں نے ابتدائی علاج کیا۔ اس کے بعد زخمیوں کو اسپتال میں داخل کرایا گیا۔ پد یاترا کے درمیان راہل گاندھی زخمی کارکنوں سے ملنے اسپتال پہنچے اور ان کی حالت دریافت کی اور ان کی جلد صحت یابی کے لئے دعا کی۔

کانگریس پارٹی کی 'بھارت جوڑو یاترا' 7 ستمبر کو کنیا کماری سے شروع ہوئی، 3750 کلومیٹر کا فاصلہ طے کرتی ہوئی سری نگر، جموں و کشمیر میں ختم ہوگی۔ اس دوران پد یاترا 12 ریاستوں اور مرکز کے زیر انتظام علاقوں سے گزرے گی۔