کارپوریشن کی زمین پر قبضہ معاملہ میں دہلی بی جے پی صدر آدیش گپتا کے خلاف عآپ کا مظاہرہ

نئی دہلی: عام آدمی پارٹی (عآپ) نے جمعہ کو دہلی میں بھارتیہ جنتا پارٹی (بی جے پی) کے صدر آدیش گپتا کے خلاف کارپوریشن کی زمین پر قبضہ کرنے کے خلاف احتجاج کیا۔ عآپ کے سینئر لیڈر درگیش پاٹھک نے بتایا کہ بی جے پی دہلی کے ریاستی صدر آدیش گپتا نے کارپوریشن کے اسکول کی زمین پر ذاتی استعمال کے لیے قبضہ کیا۔ انہوں نے اپنے بیٹوں کے ساتھ مل کر اس زمین پر اپنا دفتر بنایا۔ کتنی شرم کی بات ہے کہ وہ بچوں سے اسکول چھین کر اس پر غیر قانونی تعمیرات کر رہے ہیں۔

دہلی ہائی کورٹ نے خود گپتا کے خلاف غیر قانونی تعمیرات کو لے کر نوٹس جاری کیا ہے لیکن انھوں نے ابھی تک کوئی جواب نہیں دیا ہے۔ بی جے پی بہت باتیں کرتی ہے کہ یہ ایک صاف ستھری پارٹی ہے، لیکن ان کا اصل کردار کچھ اور ہے۔ اگر کوئی ان کے خلاف بولے تو یہ لوگ ان کے خلاف قانونی کارروائی کرنے کی دھمکی دیتے ہیں۔ آدیش گپتا ہائی کورٹ کے نوٹس کا جواب کیوں نہیں دیتے؟ انہیں جواب دینا پڑے گا۔

عام آدمی پارٹی نے پارٹی ہیڈکوارٹر پر گپتا کے خلاف غیر قانونی تعمیرات پر نعرے لگائے۔ اس دوران عام آدمی پارٹی نے ان سے فوری استعفیٰ کا مطالبہ کیا ہے۔ ان کا کہنا ہے کہ آدیش گپتا نے دہلی کے لوگوں کو دھوکہ دیا ہے اس لیے انہیں اپنے صدر کے عہدے پر برقرار رہنے کا کوئی حق نہیں ہے۔ انہیں فوری طور پر عہدے سے ہٹایا جائے۔

احتجاج کے دوران جنوبی دہلی میونسپل کارپوریشن (ساؤتھ ایم سی ڈی) کے اپوزیشن لیڈر پریم چوہان نے بتایا کہ کارپوریشن پر بی جے پی کی حکومت ہے جس کے ریاستی صدر آدیش گپتا ہیں۔ چونکہ وہ بی جے پی کے کونسلر بھی ہیں اور ایم سی ڈی کے میئر بھی رہ چکے ہیں۔ یہی وجہ ہے کہ وہ اچھی طرح جانتے ہیں کہ بدعنوانی کو کیسے انجام دینا ہے۔