عآپ نے مہاراشٹر میں بھی اسمبلی انتخاب لڑنے کا کیا اعلان، ممبئی کی 36 اسمبلی سیٹوں پر امیدوار اتارنے کا ارادہ

عام آدمی پارٹی اس وقت مشکلات کا سامنا کر رہی ہے، کیونکہ دہلی کے وزیر اعلیٰ اروند کیجریوال سمیت کئی سرکردہ لیڈران جیل میں بند ہیں۔ اس کے باوجود عآپ کے دیگر لیڈران کسی بھی حال میں پارٹی کو کمزور نہیں ہونے دینا چاہتے۔ یہی وجہ ہے کہ انھوں نے مہاراشٹر میں رواں سال ہونے والے اسمبلی انتخاب لڑنے کا اعلان کر دیا ہے۔

عام آدمی پارٹی (عآپ) کی ممبئی صدر پریتی شرما مینن نے ارادہ ظاہر کیا ہے کہ ممبئی میں پارٹی 36 سیٹوں پر اپنے امیدوار اتارے گی۔ اس سلسلے میں پارٹی کارکنان نے تیاری بھی شروع کر دی ہے۔ اس کے علاوہ عآپ مہاراشٹر میں انڈیا الائنس میں رہ کر انتخاب لڑے گی یا تنہا، اس سلسلے میں بھی رخ صاف کر دیا ہے۔ پریتی شرما کا کہنا ہے کہ ’’عآپ انڈیا الائنس کا ایک مضبوط حصہ ہے۔ حالانکہ انڈیا الائنس لوک سبھا انتخاب کے لیے بنا تھا اور اس میں بھی ہماری جیت ہوئی تھی۔ مہاراشٹر اسمبلی انتخاب ایک الگ موضوع ہے۔ یہ مقامی ایشوز پر لڑا جائے گا۔‘‘ انھوں نے مزید کہا کہ ’’مہاراشٹر کو فلاحی حکومت کی ضرورت ہے۔ اس لیے عآپ مہاراشٹر میں انتخاب لڑنے کے لیے تیار ہے۔ مہاراشٹر میں ہمارا ووٹ بینک بہت مضبوط ہے۔‘‘

قابل ذکر ہے کہ رواں سال لوک سبھا انتخاب میں عآپ نے پنجاب کو چھوڑ کر باقی ریاستوں میں انڈیا الائنس کے ساتھ مل کر انتخاب لڑا تھا۔ حالانکہ اب آنے والے وقت میں کئی ریاستوں میں اسمبلی انتخابات ہونے ہیں اور پارٹی نے تن تنہا میدان میں اترنے کا ارادہ کیا ہے۔ پارٹی نے پہلے ہی اعلان کر دیا ہے کہ ہریانہ اور دہلی میں جب اسمبلی انتخاب ہوگا تو کسی کے ساتھ اتحاد نہیں کیا جائے گا۔