ایودھیا کی متنازع زمین کے لئے نیا فارمولہ پیش

نئی دہلی۔ سپریم کورٹ کی تاریخ طے ہونے کے بعد ایودھیا تنازعہ کا عدالت کے باہر حل نکالنے کی کوشش تیز ہونے لگی ہے۔ اس سلسلہ میں پیر کے روز گاندھی جینتی کے موقع پر نئی دہلی واقع کانسٹی ٹیوشن کلب میں ایک بین مذاہب مذاکراتی اجلاس کا انعقاد کیا گیا جس میں شامل کئی دانشوران نے رام مندر بابری مسجد تنازعہ کے حل کا ایک نیا فارمولہ پیش کیا۔ حالانکہ اسی پروگرام میں شامل بی جے پی کے سابق رکن پارلیمنٹ مہنت رام بلاس ویدانتی نے کسی بھی فارمولہ کو خارج کرتے ہوئے صاف کر دیا ہے کہ ایودھیا کی زمین پر صرف اور صرف مندر تعمیر ہو سکتا ہے اور کچھ بھی نہیں۔

جس بین مذاہب اجلاس میں ایودھیا کی زمین کے لئے نیا فارمولہ پیش کیا گیا اسے پونے واقع ایم آئی ٹی ورلڈ پیس یونیورسٹی کے سربراہ ڈاکٹر وشو ناتھ کراڑ نے طلب کیا تھا۔ نئے فارمولہ کے تحت ایودھیا کی 2.77 ایکڑ متنازع زمین پر مندر تعمیر کرنے کی تجویز پیش کی گئی جبکہ حکومت کی طرف سے ایکوائر کی گئی 67 ایکڑ زمین پر ایک ایسی عمارت تعمیر کرنے کی پیشکش کی گئی جس میں تمام مذاہب کے لئے عبادت گاہیں بنائی جا سکیں۔ ڈاکٹر وشوناتھ کراڑ اپنے اس فارمولہ کے حوالے سے وزیر اعظم نریندر مودی کو خط بھی تحریر کر چکے ہیں۔

دہلی کے کانسٹی ٹیوشن کلب میں منعقدہ اجلاس میں رام جنم بھومی نیاس کے سابق کارگزار سربراہ اور سابق رکن پارلیمنٹ رام بلاس ویدانتی ، سابق مرکزی وزیر عارف محمد خان، سوامی اگنی ویش ، ناگپور یونیورسٹی کے سابق وائس چانسلر ایس این پٹھان، نالندا یونیورسٹی کے چانسلر وجے پی بھٹکر اور جموں کشمیر قانون ساز کونسل کے نائب چیئر مین جہانگیر حسن میر نے اپنے خیالات کا اظہار کیا۔

اجلاس میں شامل رام بلاس ویدانتی نے ایک خبار سے بات چیت میں کہا کہ رام جن بھومی پر صرف اور صرف رام للا کا مندر ہی بن سکتا ہے اور کچھ بھی نہیں۔ ویدانتی نے مزید کہا کہ انہیں یقین ہےت کہ مودی اور یوگی کی جوڑی 2019 کے انتخابات سے قبل رام مندر کی تعمیر کا کام شروع کرا دیں گے۔