راجستھان میں بڑا ریل حادثہ ٹل گیا، کوٹا جنکشن کے قریب جودھ پور-بھوپال ایکسپریس کے دو ڈبے پٹری سے اترے

نئی دہلی: راجستھان میں جمعہ کو ایک بڑا ٹرین حادثہ ٹل گیا۔ دیر رات کوٹا جنکشن کے قریب مسافر ٹرین کے دو ڈبے پٹری سے اتر گئے۔ جس کی وجہ سے ریلوے ٹریک پر ٹرینوں کی آمدورفت مکمل طور پر ٹھپ ہو گئی اور کئی ٹرینوں کو دوسرے ٹریک پر موڑ دیا گیا۔

خبر رساں ایجنسی اے این آئی کے مطابق جودھپور-بھوپال ایکسپریس ٹرین جودھپور سے بھوپال جا رہی تھی، جب یہ ٹرین جمعہ کی رات دیر گئے کوٹا جنکشن پہنچی، اسی وقت یہ حادثہ پیش آیا۔ راحت کی بات یہ ہے کہ اس واقعہ میں کسی جانی نقصان کی کوئی خبر نہیں ہے۔ یہ ٹرین جمعہ کی صبح تقریباً 10 بجے جودھ پور سے روانہ ہوئی تھی۔

ٹرین کے دو ڈبے پٹری سے اترنے کے سبب مسافروں میں خوف و ہراس پھیل گیا۔ واقعے کے بعد ریلوے ٹیم نے مسافروں کو ٹرین سے نکالنے میں مدد کی۔ معلومات کے مطابق اب ریلوے ٹریک کو بحال کر کے ٹرین کو روانہ کر دیا گیا ہے جس کے بعد ٹرین تقریباً تین گھنٹے کی تاخیر کا شکار ہو گئی۔