اسپوتنک وی ٹیکوں کی ایک بڑی کھیپ حیدرآباد پہنچی

حیدرآباد: جی ایم آرحیدرآباد ایرکارگو (جی ایچ اے سی) نے آج اسپوتنک وی ٹیکوں کی ایک بڑی کھیپ کو حاصل کیا۔ یہ ٹیکوں کی کھیپ روس سے خصوصی طیارہ کے ذریعہ یہاں آج صبح کی اولین ساعتوں میں 3.43 بجے پہنچی۔ آج کے 56.6 ٹن ٹیکے اب تک ہندوستان کو حاصل ہونے والے سب سے زیادہ ٹیکوں میں شامل ہے۔ حیدرآباد ایرپورٹ پر 90 منٹ سے کم وقت میں ان ٹیکوں کو حاصل اور روانہ کرنے کا عمل مکمل کیا گیا۔ اسپوتنک وی ٹیکوں کو خصوصی طور پر منفی 20 سنٹی گریڈ درجہ حرارت میں رکھا گیا۔ جی ایچ اے سی، سپلائی کی ٹیم کے ماہرین کے ساتھ کام کر رہی ہے۔

محکمہ کسٹم کے عہدیدار اور دیگر فریقین ان ٹیکوں کی کھیپ کو آسانی کے ساتھ ایرکارگو ٹرمنل سے حاصل کرنے کے عمل کو انجام دے رہے ہیں۔ اس درآمد کردہ ٹیکوں کی سب سے بڑی کھیپ کو آسانی سے حاصل کرنے کے ساتھ ہی جی ایچ اے سی، ہندوستان کے لئے سب سے زیادہ ٹیکوں کو درآمد کرنے کے مقام پر قائم ہے۔ دواوں کی سب سے بڑی کمپنیوں کا مرکز حیدرآباد میں ہے اور توقع ہے کہ اس کے ذریعہ آئندہ چند برسوں میں کووڈ کے مختلف ٹیکوں کے تقریباً 3.5 بلین ڈوز درآمد کیے جائیں گے یا ان ٹیکوں کی پیداوار کی جائے گی۔

جی ایچ اے سی ٹیکوں کی کھیپ میں اضافہ کے لئے تمام محاذوں کی تیاری کر رہی ہے۔ جی ایچ اے سی میں درجہ حرارت کو کنٹرول کرنے کے لئے اہم عناصر کی تمام صلاحیتوں کے ساتھ توسیع عمل میں لائی گئی ہے۔ دیگر اقدامات کے ساتھ ساتھ جی ایچ اے سی فارما زون کی گنجائش میں توسیع کر رہی ہے جو ہندوستان کا فارما کارگو درآمد کرنے والا ٹرمنل ہے اور درجہ حرارت کو کنٹرول کرنے والے انوکھے”کول ڈولی“ کو متعارف کیا گیا ہے تاکہ ٹرمنل سے طیارہ تک کھیپ کو محفوظ طریقہ سے منتقل کیا جاسکے۔