ایئر انڈیا کی فلائٹ میں نشے میں دھت شخص نے خاتون پر کیا پیشاب! ڈی جی سی اے نے طلب کی رپورٹ

نئی دہلی: سول ایوی ایشن کے ڈائریکٹوریٹ جنرل (ڈی جی سی اے) نے نومبر میں ایئر انڈیا کی بزنس کلاس میں ایک خاتون پر نشے میں دھت مسافر کے پیشاب کرنے کے واقعے کی مکمل رپورٹ طلب کی ہے۔ آئی اے این ایس کی رپورٹ کے مطابق یہ معاملہ اس وقت سامنے آیا جب خاتون نے مبینہ طور پر ایئر انڈیا کے گروپ چیئرمین این چندرشیکرن کو خط لکھا۔ ایئر لائن نے معاملہ درج کر لیا ہے اور سفارش کی ہے کہ جہاز میں موجود شخص کو ’نو فلائی لسٹ‘ میں رکھا جائے۔

ڈی جی سی اے نے کہا کہ غفلت برتنے والوں کے خلاف مناسب کارروائی کی جائے گی۔ ڈی جی سی اے نے بدھ کو کہا ’’ہم ایئر لائن سے رپورٹ طلب کر رہے ہیں اور غفلت برتنے والوں کے خلاف کارروائی کریں گے۔‘‘ یہ واقعہ 26 نومبر کو اس وقت پیش آیا تھا۔ حالتِ نشہ میں ایک مسافر نے مبینہ طور پر نیویارک سے دہلی جانے والی ایئر انڈیا کی بزنس کلاس فلائٹ میں ایک خاتون مسافر پر اس وقت پیشاب کر دیا تھا جب رات کے کھانے کے بعد لائٹیں بند تھیں۔

یہ شخص مبینہ طور پر اس وقت تک نہیں ہلا جب تک کسی دوسرے مسافر نے اسے وہاں سے جانے کو نہیں کہا۔ خاتون نے اس معاملے کی اطلاع عملے کو دی اور بتایا کہ اس کے کپڑے، جوتے اور بیگ پیشاب سے بھیگ چکے ہیں۔ رپورٹ میں کہا گیا ہے کہ عملے نے مبینہ طور پر اسے کپڑوں اور چپلوں کا ایک سیٹ دیا اور اسے اپنی سیٹ پر واپس آنے کو کہا۔

ذرائع نے بتایا کہ ایئر انڈیا نے اب اس شخص کے خلاف پولیس میں شکایت درج کرائی ہے۔ ذرائع نے بتایا کہ ایئر انڈیا نے ایک اندرونی کمیٹی تشکیل دی اور ملزم مسافر کو 'نو فلائی لسٹ' میں ڈالنے کی سفارش کی۔ معاملے کی جانچ کمیٹی کر رہی ہے اور فیصلے کا انتظار ہے۔

اگرچہ ایئر انڈیا نے اس بارے میں کوئی تفصیلی بیان جاری نہیں کیا ہے، تاہم ذرائع کا کہنا ہے کہ خاتون نے مبینہ طور پر اپنے خط میں کہا ہے کہ وہ گندی سیٹ پر نہیں بیٹھنا چاہتی تھی، اس لیے اسے عملے کی سیٹ فراہم کی گئی۔ تاہم، عملے نے ایک گھنٹے کے بعد مبینہ طور پر اسے اپنی سیٹ پر واپس جانے کے لیے کہا، جو چادروں سے ڈھکی ہوئی تھی۔ انہوں نے کہا کہ عملے نے سیٹ پر جراثیم کش اسپرے کیا تھا۔

جب خاتون نے وہی سیٹ لینے سے انکار کیا تو اسے عملے کی دوسری سیٹ کی پیشکش کی گئی۔ یہ بھی الزام لگایا گیا ہے کہ ایک سیٹ خالی ہونے کے باوجود خاتون کو بزنس کلاس میں الگ سیٹ نہیں دی گئی۔ پرواز میں بے راہ روی کے کئی واقعات پیش آ چکے ہیں۔ حال ہی میں ایک ہوائی مسافر اور انڈیگو کی فلائٹ کے عملے کے ارکان میں سے ایک کے درمیان گرما گرم بحث سوشل میڈیا پر وائرل ہوئی تھی۔