دہلی کے سرکاری اسکول میں مڈ ڈے میل کھانے سے 70 طلبا بیمار، پولیس نے کھانے اور جوس کا لیا سیمپل

دہلی کے سروودے بال وِدیالیہ اسکول میں مڈ ڈے میل کھانے کے بعد جمعہ کو تقریباً 70 بچے بیمار پڑ گئے جنھیں فوری طور پر اسپتال میں داخل کرایا گیا ہے۔ ڈی سی پی نے بتایا کہ فی الحال سبھی طلبا کی حالت مستحکم ہے اور گھبرانے کی ضرورت نہیں ہے۔ اس معاملے میں ایف آئی آر درج کر جانچ کی کارروائی شروع ہو گئی ہے۔

جنوب مغربی دہلی کے پولیس ڈپٹی کمشنر منوج سی نے واقعہ کے تعلق سے بتایا کہ جمعہ کی شام تقریباً 6 بجے ساگرپور پولیس تھانے میں ایک کال آئی۔ اس میں بتایا گیا کہ ساگرپور کے درگا پارک واقع سروودے بال ودیالیہ اسکول میں چھٹی سے آٹھویں درجہ کے تقریباً 70 طلبا نے مڈ ڈے میل کے کھانے کے بعد الٹی اور پیٹ درد کی شکایت کی ہے۔

ڈی سی پی نے کہا کہ پولیس کی ایک ٹیم فوراً جائے حادثہ پر پہنچی اور پایا کہ طلبا کو ڈابری کے ڈی ڈی یو اسپتال اور دادا دیو اسپتال میں داخل کرایا گیا ہے۔ موقع پر موجود اسکول افسران کے مطابق طلبا کو مڈ ڈے میل کے کھانے کے بعد سویا کا جوس دیا گیا تھا جس کے بعد انھیں پیٹ میں درد اور الٹی کی شکایت ہوئی۔

ڈی سی پی کا کہنا ہے کہ فوراً کرائم ٹیم کو موقع پر بلایا گیا اور کھانے اور جوس کے سیمپل بطور ثبوت جمع کیے گئے۔ درجہ 6 اور 8 تک کے طلبا کو لنچ میں پوری سبزی دیے جانے کے بعد سویا کا جوس تقسیم کیا گیا تھا۔ کچھ بچوں کے ذریعہ پیٹ درد کی شکایت ملنے پر کھانا اور جوس کی تقسیم دوسرے بچوں میں نہیں کی گئی۔